धनगढी उपमहानगरपालिकासे तीन ठो विधेयक पारित
पहुरा समाचारदाता
धनगढी, २१ फागुन । धनगढी उपमहानगरपालिकासे तीन ठो महत्वपूर्ण विधेयक पारित करले बा । शुकके रोज हुइल छैठौं नगरसभासे विधेयक उप्पर छलफल करके पारित करल हो ।
सभासे (न्यायिक समिति कार्यविधि) ऐन २०७४ के पहिलो संशोधन २०७७, धनगढी उपमहानगरपालिका स्वास्थ्य सम्बन्धी ऐन २०७७, धनगढी उपमहानगरपालिकाके वातावरण तथा प्राकृतिक श्रोतके संरक्षण सम्बन्धी ऐन २०६६ के विधेयक उप्पर नगर सभा सदस्यसे छलफल तथा पारित करल नगर प्रमुख नृपबहादुर वड बटैलै । ओस्टेक उहाँ अपनेहुक्रे निर्वाचित हुके आइलपाछे १४ ठो ऐन, ४ ठो नियमावली, ३२ ठो कार्यविधी, ३ ठो निर्देशिका ओ २ ठो आचारसंहित करके ५५ ठो कानून निर्माण करल बटैलै । छैठौं नगरसभासे टमान एजेन्डामेफे छलफल हुइल रहे ।
नगरसभा बोल्टी नगरप्रमुख तथा नगरसभा अध्यक्ष वड नगरसभाके सक्कु सदस्य दिनरात जनताके सेवामे खटल कारण धनगढी उपमहानगरपालिकाहे देशके उत्कृष्ठ नगरके रुपमे सम्मानित हुइल बटैलै । अपनेहुक्रे निर्वाचित हुके आइलपाछे अब्बेसम करल कामके समीक्षा करटी जनतासंग करल प्रतिवद्धता बाँकी रहल समयमे पुरा करे पर्ना बा, नगरप्रमुख वड कहलै, ‘टबमारे बाँकी समय हमार लाग महत्वपूर्ण बा ।’
अपनेहुक्रे निर्वाचित हुके आइलपाछे १९ ठो वडा कार्यालय मन्से १६ ठो वडाके अपने कार्यालय भवन निर्माण करल, ३ ठो स्वास्थ्य संस्थासे १० ठो वडामे नगर स्वास्थ्य केन्द्र स्थापना करल, पूर्वाधार विकाससे गति लेहल नगरप्रमुख वड बटैलै । उहाँ कहलै, ‘समाजिक क्षेत्रमेफे उल्लेख्य काम करले बटी ।’
धनगढी उपमहानगरपालिकासंग जोरल लौवा वडामे नमुनाके रुपमे विकास करल बा नगरप्रमुख वड कहलै, ‘यी अवधिमे केल २७ ठो विद्यालय भवन, शौचालय निर्माण करल बा नगरप्रमुख वड कहलै, खानेपानी योजनाहुकनके विकासके तथ्यांकहे हेर्ना हो कलेसे धनगढी देशमे दुसरा स्थानमे परठ ।’ ओस्टेक करके नगरप्रमुख वडसे बेहडाबाबा, जाखोरताल, शिवपुरीधाम लगायतके धार्मिक पर्यटकीय ठाउँके गुरु योजना अन्सार काम हुइटी रहल नगरप्रमुख वड बटैलै । नगरप्रमुख वडसे कोरोनाके समयमे जनप्रतिनिधिहुक्रे खेलल भूमिकाके प्रशंसा करलै ।
धनगढी उपमहानगरपालिकाके उपप्रमुख सुशीला मिश्र भट्टसे नगरसभामे टेबुल हुइल विधेयक उप्पर विधायन समिति ओ सरोकारवालासंग छलफल हुइल बटैली । स्पष्ट हुइ नइसेकल विषयमे नगरसभा सदस्यहुक्रे डेहल सुझावहे समावेश करलपाछे कानूनहुक्रे राजपत्रमे प्रकाशित हुइही कहलेसे उपप्रमुख भट्ट कहली, ‘सक्कु विषयमे गहन छलफल हुइ सेक्लेसे केल उत्कृष्ठ कानुन बने सेकठै ।’ उपप्रमुख भट्ट नगरसभा सदस्यहुक्रे डेहल सुझाव उपमहामहानगरपालिकाके लाग महत्वपूर्ण रहल बटैली ।’
धनगढी उपमहानगरपालिका वडा नम्बर १८ के अध्यक्ष मुरारी अधिकारी नम्मा रिक्ततापाछे अपने स्थानीयतहमे निर्वाचित हुके आइल बटैली । जनतासंग अपेक्षा ढेर बटै, अध्यक्ष अधिकारी कहलै, ‘सक्कु अपेक्षा यिहे कार्यकालमे पुरा हुई नइसेकी ।’ धनगढी उपमहानगरपालिका वडा नम्बर ७ के अध्यक्ष सीताराम राना हावाहुरी ओ कोरोनाके विचमेफे धनगढी उपमहानगरपालिकामे उल्लेख्य काम हुइल बटैलै ।
धनगढी उपमहानगरपालिका वडा नम्बर ३ के अध्यक्ष बलबहादुर ऐर चुनावके समयमे जनतासंग करल प्रतिवद्धता कटरा पुरा करे सेक्ली कहिके समीक्षा करटी आघे बढे पर्ना बटैलै । सभामे ३ दर्जनसे ढेर नगरसभा सदस्यहुक्रे छलफलमे भाग लेहल रहिट ।
