अन्तर्राष्ट्रिय महिला दिवसके अवसरमे वक्तृत्व कला
पहुरा समाचारदाता
हसुलिया, २१ फागुन । १११ औं अन्तर्राष्ट्रिय श्रमिक महिला दिवसके अवसरमे कैलारी गाउँ पालिकामे विविध कार्यक्रम कैके मनैना हुइल बा ।
इहे फागुन २४ गते मार्च ८ गते पर्ना अन्तराष्ट्रिय श्रमिक महिला दिवस मनाइक लाग गाउँपालिकाके उपाध्यक्ष लक्ष्मी सत्गौंवा थारुके अध्यक्षतामे बैठक बैठके विविध कार्यक्रम आयोजना कैके मनैना निर्णय कररल बा । ‘महिलाको सुरक्षा, सम्मान ओ रोजगार : समृद्ध नेपालके आधार’ कना मूल नाराके साथ मनैना दिवसके अवसरमे शुकके मावि स्तररीय वक्तत्व कला प्रतियोगिता सम्पन्न हुइल बा ।
प्रतियोगितमे राष्ट्रिय मावि बिचैपुरके मनोज चौधरी प्रथम ओ राष्ट्रिय मावि भुँइयाँफाँटाके विक्रम साउँद द्धितीय ओ खिमा बम टिसरा हुइल बाटै । प्रतियोगितामे १४ जाने विद्यार्थीनके सहभागिा रहल रहे ।
ओस्टके उहे अवसरमे सचेतना मूलक नाटक, खुला दौड प्रतियोगिता, म्युजिकल चियर लगायत कार्यक्रम फेन हुइना गाउँपालिकाके महिला तथा बालबालिका शाखा प्रमुख बालकुमारी चौधरी जानकारी डेली । साथे उक्त प्रतियोगितमे प्रथम, द्वितीय हुउइया सहभागीहुक्रनहे फागुन २४ गते हुइना औपचारिक कार्यक्रममे पुरस्कृत कैना उहाँ जानकारी डेली ।
साथे उहे अवसरमे उत्कृष्ट सहकारी, दीप आपंगता विकास समाज नेपाल, ओ उत्कृष्ट विद्यार्थीहे फेन सम्मान कैना कार्यक्रम रहल बा । महिला तथा बालबालिका शाखा कार्यालयके आयोजनामे हुइना कार्यक्रमके आर्थिक ओ प्राविधिक सहयोग गाउँपालिका अन्तर्गत रहल टमान संघ संस्थासे सहयोग कैना जनाइल बा ।
सहयोग करुइया संघ संस्थामे कालिका बहुउद्देश्यी सहकारी संस्था, पारदर्शी महिला विकास वहुउद्देश्यीय सहकारी संस्था, सामाजिक सेवा केन्द्र, दलित महिला अधिकार मञ्च, नेपाल रेडक्रस सोसाइटी नेपाल, हिम शिखर बहुउद्देश्यीय सहकारी संस्था, फाया नेपाल, प्रगतीशिल मुक्त कमलहरी वहुउद्देश्यीय सहकारी संस्था, ओरेक नेपाल लगायत सहयोग कैना जनाइल बा ।
