बाल बाटिका ओ विद्या भूषणके दुसरा जित

पहुरा समाचारदाता
धनगढी, २२ फागुन । नव बाल बाटिका स्कुल बौैैैनिया ओ विद्या भूषणसे चण्डिका ग्रुप लिटल फ्लावर प्रिमियर लिग (एलपीएल) क्रिकेट प्रतियोगितामे दुसरा जित निकरले बटै शुकके हुइल पहिल खेलमे नव बाल बाटिकासे रोजी बड्सहे ८ विकेटसे पराजित करल ।

पहिल ब्याटिङ करल रोजी बड्ससे १५ ओभर २ बलमे अलआउट हुइटी ८० रन बनाइल । रोजी बड्सके याकुब मियासे २४ रन बनैलै । बाल बाटिकाके विशाल बिक्रम केसी ३, हिमाल बिक ओ हिमाल मल्ल २÷२ विकेट लेलै । रोजी बड्ससे डेहल सामान्य लक्ष्य बाल बाटिकासे ९ ओभरमे २ विकेट गुमाके पुरा करल ।

बाल बाटिकाके लाग विशाल बिक्रम केसी अविजित २६ रन जोरेबेर कमल ओली अविजित १५ रन बनैलै । खेलके प्लेयर अफ दि म्याच बाल बाटिकाके विशाल बिक्रम केसी चुन्लै । प्रतियोगितामे बाल बाटिकाके दुसरा जित हो ।

शुकके हुइल दुसरा खेलमे विद्या भूषणसे धनगढीके त्रिनगर माविहे ६४ रनके फरछवार अन्तरसे पराजित करल । टस जिटके ब्याटिङ करल विद्या भूषणसे १७ ओभरमे सक्कु विकेट गुमैटी ९१ रन बनाइल रहे । ओकर लाग प्रदिप चन्द ३६ रन बनैलै । त्रिनगरके खड्क नगरकोटीसे ३, बसन्त थापा, पदम पनेरु ओ सुलभ सेवासे २÷२ विकेट लेलै ।

९२ रनके विजयी लक्ष्यसहित जवाफी ब्याटिङ करल त्रिनगर ६ ओभर १ बलमे सक्कु विकेट गुमैटी २७ रनमे समेटल । ओकर कौनोफे ब्याट्सम्यानसे दोहोरो अंक छुए नइसेकल । त्रिनगरहे सस्तामे समेट्न क्रममे विद्या भूषणके विरेन्द्र नाथ ६ ओ शेर मल्लसे ४ विकेट लेलै । खेलके म्यान अफ द म्याच विद्या भूषणके वीरेन्द्र नाथ हुइलै । प्रतियोगितामे विद्या भूषणकेफे दुसरा जित हो ।

प्रतियोगिता अन्तर्गत आज होलिल्याण्ड ओ धनगढी नमुना तथा बाल बाटिका ओ गुरुकुलबीच खेल हुई । प्रतियोगितामे १६ टिमके सहभागिता रही ।

विजेता १ लाख २० हजार पैही । ओस्टेक उपविजेता ६० हजार प्राप्त करेबेर सर्वोत्कृष्ट खेलाडी १० हजार पैही । उत्कृष्ट ब्याट्सम्यान, बलर ओ उदयमान खेलाडीसे ५÷५ हजार पैही ।