काँग्रेसके लौवा क्रियाशील सदस्यता वितरण करटी

पहुरा समाचारदाता
धनगढी, २३ फागुन । नेपाली काँग्रेस कैलालीसे पार्टीके लौवा क्रियाशील सदस्यता वितरण कार्य सुरु करले बा । अइना १४ औँ महाधिवेशनके तयारीके लाग लौवा क्रियाशील सदस्यता वितरणके कामहे तीव्रता डेहल हो । पार्टी विधानसे तोकल कार्यविधि बमोजिम जिल्ला मार्फत हस्तान्तरण हुइल क्रियाशील सदस्यता फाराम प्रतिनिधिसभा क्षेत्रीय कार्यसमिति हुइटी वडा कार्यसमितिसम पुग्ही ।

यी आघे पुराना क्रियाशील सदस्यता नवीकरणके कार्य सेकलसंग लौव क्रियाशील सदस्यता वितरण करे लाग नेपाली काँग्रेस कैलालीके जिल्ला सदस्य तथा युवा नेता नृपबहादुर सुनार जानकारी डेलै ।

शनिच्चर जिल्ला सभापति नरनारायण शाह मनु प्रतिनिधिसभा निर्वाचन क्षेत्र नं ५ से लौवा क्रियाशील सदस्यता फाराम वितरण कार्य प्रारम्भ करल हुइट । प्रतिनिधिसभा क्षेत्रीय कार्यसमिति सभापति हरिष खड्काहे जिल्ला सभापति शाहसे क्रियाशील सदस्यता फाराम हस्तान्तरण करलै ।

यी आघे नेपाली काँग्रेस जिल्ला कार्य समिति कैलालीसे क्रियाशील सदस्यता नवीकरणके कार्यप्रक्रियाके पूरा करसेकल बा कलेसे लौवा वितरणके लाग फागुन २० गते नेपाली काँग्रेस केन्द्रीय क्रियाशील छानबिन समिति संयोजक रमेश लेखकके उपस्थितिमे जिल्ला पदाधिकारी, स्थायी आमन्त्रित सदस्य, पदेन सदस्य, प्रतिनिधि सभार प्रदेशसभाके सांसद, क्षेत्रीय ओ गाउँ नगर वडा सभापति, भातृ तथा शुभेच्छुक संस्थाके केन्द्रीय पदाधिकारी तथा सदस्यहुकनसंग छलफल तथा अनुशिक्षण सम्पन्न करले बा ।

नेपाली काँग्रेसके केन्द्रीय कार्य समितिके गैल फागुन ८ गते सम्पन्न केन्द्रीय कार्यसमितिसे महाधिवेशनके लौव कार्यतालिका सार्वजनिक करलअनुसार २०७७ चैत १० भिटर जिल्लामे वितरण हुइल लौवा क्रियाशील सदस्यता वितरण करके सदस्यता प्राप्त करल सदस्यताके सूचि प्रतिनिधि सभा क्षेत्रीय कार्यसमिति मार्फत जिल्ला ओ केन्द्रमे पठा सेके प्रावधान रहल जिल्ला सभापति नरनारायण शाह बटैलै ।

नेपाली काँग्रेसके गैल फागुन ८ गते पार्टी कार्यालय सानेपामे बैठल केन्द्रीय कार्यसमितिके बैठकसे महाधिवेशन कार्यतालिका परिमार्जन करटी लौवा कार्यतालिका सार्वजनिक करल रहे । जौन अनुसार अइना २०७८ भदौ ७ से १० गतेसम महाधिवेशन कैना कार्यतालिका सार्वजनिक करल हो ।

पार्टीसे विद्यमान रहल संख्या बराबर लौवा क्रियाशील सदस्यता वितरण कैना लागल जिल्ला सदस्य नृपबहादुर सुनार बटैलै । यी बर्ष पार्टीसे लौव युवा, दलित , महिला, जनजाती, पिछरल वर्ग समुदायहे समानुपातिक ओ समाबेशी सिद्धान्तअनुसार लौव क्रियाशील सदस्यता वितरण कैना मातहत निकायहे सभापति नारायण शाहसे जानकारी तथा प्रष्ट निर्देशन डेहल नेता सुनारसे बटैलै ।

कैलाली जिल्लामे ८ हजार ७ सय ४६ सदस्य नवीकरणके कार्य सम्पन्न हुइटी कलेसे लौवा क्रियाशील सदस्यताफे उहे बमोजिम शतप्रतिशत क्षेत्रीय कार्य समितिहे उपलब्ध कराइल बा ।

काँग्रेससे विधान अन्सार पाँच वर्ष महाधिवेशन करे नइसेकलपाछे संविधानके धारा २६९ से डेहल ठप ६ महिनाके कार्यकाल ठप करके भदौमे महाधिवेशन कैना निर्णयमे पुगल रहे । सार्वजनिक लौवा कार्यतालिका अनुसार समायोजन हुइना बाँकी रहल जिल्लाके अन्तरिम संरचना फागुन १५ गतेभिटर समायोजन हुसेके पर्ना उल्लेख बा ।

फागुन २८ गतेभिटर सक्कु जिल्ला क्रियाशील सदस्यता नवीकरण तथा लौवाके टुंगो लगाइसेके पर्ना बा ओ असार ७ गतेभिटर केन्द्रीय कार्यसमितिसे देशभरसे आइल क्रियाशिल सदस्यताके निर्णय काँग्रेससे यी आघे सेकल बा ।

पारित लौवा महाधिवेशन कार्यतालिके अनुसार गाउँरनगर वडा अधिवेशन असार २० गते, गाउँ÷नगरपालिकाके अधिवेशन असार २२, प्रदेशसभा क्षेत्रीय अधिवशेन असार २५, एक ठो प्रतिनिधिसभा क्षेत्रीय अधिवेशन असार २७ गते हुई । ओस्टेक एकसे ढेर प्रतिनिधि सभा निर्वाचन क्षेत्र रहल जिल्ला अधिवेशन असार ३० गते, प्रदेश तहके अधिवेशन सावन ६ गते हुइ कलेसे केन्द्रीय महाधिवशेन भदौ ७ गतेसे सुरु हुई ।