सहकारीहे नेटवर्किङमे जोरे पर्नामे जोड

पहुरा समाचारदाता
धनगढी, २३ फागुन । सहकारी संस्थाके काम कर्वाही छिटो छरिटो ओ पारदर्शिता बनाइक लाग डिजिटल प्राविधिसे जोडे पर्ना एक कार्यक्रममे जोड डेहल बा ।

शनिच्चरके रोज धनगढीमे हव को–अपरेटिभ्स लिमिटेड काठमाण्डौके आयोजना तथा कैलाली जिल्ला बचत तथा ऋण सहकारी संस्था लिमिटेड धनगढीके समन्वयमे हुइल अभिमुखीकरण कार्यक्रमके सहभागीहुक्रे उ बाटमे जोड डेहल रहिट ।

तिला कर्णाली सुखडके लालबहादुर भण्डारी, परिश्रमी बहुउद्देश्यीय सहकारी संस्थाके धर्मराज जोशी, बद्री भण्डारी लगायतसे सहकारीहे डिजिटल प्राविधिसे जोरे सेक्लेसे सेवाग्राही जहाँसेफे सेवा लेहे सेक्ना बटैलै ।

सहकारीहे डिजिटल प्राविधि कैसिक जोरेसेक्ना कार्यपत्र प्रस्तुत करटी शिव सापकोटा सहकारीसे फडको मरटी रहलओरसे आबके पिढी स्मार्ट कार्ड, मोबाइलमे पिन कार्डसे सेवा डेहे पर्ना बेला आइल बटैलै ।

कार्यक्रम हव को–अपरेटिभ्स लिमिटेड काठमाण्डौके अध्यक्ष दक्ष पौडेलके अध्यक्षतामे हुइल रहे । कार्यक्रमके संचालन राजेन्द्र पौडेल करले रहिट । कार्यक्रममे कैलाली जिल्लाके टमान सहकारीके प्रतिनिधिहुकनके सहभागिता रहे ।