ऋषि कट्टेलके पक्षमे सर्वोच्च अदालतके फैसला
काठमाडौँ, २३ फागुन । सर्वोच्च अदालतसे नेपाल कम्युनिष्ट पार्टीके अध्यक्ष ऋषि कट्टेलके पक्षमे फैसला करले बा ।
निर्वाचन आयोगमे आपन दर्ता करल नेकपा अस्तित्वमे रहटी रहटी (नेकपा) बनाके केपी शर्मा ओली ओ पुष्पकमल दाहाल प्रचण्ड निर्वाचन आयोगमे दर्ता करल कहटी डारल रिटमे सर्वोच्चसे कट्टेलके पक्षमे फैसला सुनाइल हो ।
सर्वोच्चसे इ फैसलसंगे सत्तारूढ नेपाल कम्युनिस्ट पार्टी (नेकपा) के नाउँ दर्ताके क्रममे निर्वाचन आयोगसे हुइल निर्णयहे त्रुटिपूर्ण कहटी बदर करले बा । सर्वोच्चके इ निर्णयपाछे पुस ५ मे प्रतिनिधिसभा विघटन करल यहोर दुई समूहमे विभाजित नेकपाउपरके दाबी आउर जटिल हुइना डेखल बा । डुनु समूहमे विभाजित केपी शर्मा ओली ओ पुष्पकमल दाहाल प्रचण्ड आब नेकपाके पाछे एमाले ओ माओवादी केन्द्र शब्द झुन्ड्याइ पर्ना बाध्यता आइल बा ।
कट्टेलके रिटउपर न्यायाधीश बमकुमार श्रेष्ठ ओ कुमार रेग्मीके इजलाससे फैसला करल हो । इहीसे आघे फागुन १३ गते न्यायाधीशद्वय श्रेष्ठ ओ रेग्मीके इजलाससे इ मुद्दाके फैसला २० फागुन कैना कहल रहे । मने पूर्व प्रधानन्यायाधीश सुरेन्द्रप्रसाद सिंहके निधनके कारण इहीहे आज सारल रहे ।
तत्कालीन नेकपा एमाले–माओवादी केन्द्रबीच ३ जेठ ०७५ मे एकता होके नेकपा बनल रहे । मने उ बेला नेकपाहे निर्वाचन आयोगसे दर्ता करे नैमानल रहे ।
उहीसे आघे नै २०६९ सावनमे नेकपा आयोगमे दर्ता होसेकल रहे । मने आयोगसे दाहाल–ओलीहे कोष्ठकभिट्टर नेकपा लिखके २३ जेठ ०७५ मे दर्ता प्रमाणपत्र डेहल रहे । अनि कट्टेल नेतृत्वके नेकपा सर्वोच्च अदालत पुगल रहे ।
कट्टेल २०७५ अगहन २१ गते आपन दर्ता करल नेकपा अस्तित्वमे रहटी रहटी औरे ने क पा फेन दर्ता करल कहटी सर्वोच्च अदालतमे मुद्दा दायर करल रहिट । उहीहसे आघे २०७५ जेठ पहिल अँठ्वार तत्कालीन नेकपा एमाले ओ माओवादी केन्द्र मिलके नेकपा बनल रहे । ओली ओ प्रचण्ड अध्यक्ष रहल सत्तारुढ ‘नेकपा’हे निर्वाचन आयोगसे मान्यता डेहलपाछे उहीसे आघे नै दर्ता रहल नेकपा अध्यक्ष कट्टेल अदालत पुगल रहिट ।
सर्वोच्च अदालतसे कट्टेलके नेकपाहे मान्यता डेहलसंगे दाहाल–नेपाल ओ ओली अब्बे दाबी करटी रहल नेकपा कानुनी रुपमे अवैधानिक हुइल बा । आब डुनु समूहसे नेकपा पाछे कौनो पुँछी जोरे पर्ना हुइल बा । इहीसे राजनीतिक घटनाहे औरे मोडमे लैजैना हुइल बा ।
