धनगढीमे १५ सय ढिउर लगैलै
पहुरा समाचारदाता
धनगढी, २३ फागुन । कोरोना विरुद्धके डुसरा चरणके खोप अभियान अन्तर्गत पहिल दिनमे धनगढी उपमहानगरपालिकामे १ हजार ६ सय ५६ जाने खोप लगैले बाटै ।
उपमहानगरपालिका स्वास्थ्य शाखाके अनुसार खोप लगुइयामे ६५ बरससे ८९ बरसके व्यक्ति रहल बाटै । सबसे बृद्धा धनगढी उपमहानगरपालिका वडा नं १ के पाना सोव खोप लगाइल रही । डुसरा चरणके पहिल खोप लगुइयामे नेपाली कांग्रेसके केन्द्रिय सदस्य रत्ना गौचन ओ पूर्व केन्द्रिय सदस्य शुनिल कुमार भण्डारी रहल बाटै ।
उपमहानगरपालिकाके ११ ठो केन्द्रमे खोप लगाजैटी बा । प्रमुख नृपबहादुर वड लगायत जनप्रतिनीधि खोप केन्द्रमे अपनहे खटल रहिट । ‘सक्कु खोप केन्द्रमे पुगके वहाँके अवस्था बुझ्ना काम करल रही,’ नगरप्रमुख वड कहलै, ‘हम्रे अनुमान करलसे ढिउर पहिल दिनमे खोप लगैले बाटै ।’ ढुक्क होके खोप लगैना सक्कु जनहनहे अनुरोध करटी नगरप्रमुख वड कहलै, ‘कोरोना खोपके बिषयमे कतिपय भ्रम फैलैले बाटै ओम्ने विश्वास नै कैना सक्कु जनहनहे अनुरोध करटी ।’ खोप अभियानहे प्रभावकारी बनाइक लाग महिला स्वास्थ्य स्वयंसेविकाहे परिचालन समेत करल बा ।
धनगढी उपमहानगरपालिका स्वास्थ्य शाखाके अधिकृत योगेश कुमार अवस्थी खोप अभियान प्रभावकारी रुपमे संचालन हुइटी रहल बटैलै । उहाँ कहलै, ‘सक्कु जनहनहे खोप लेहक लाग अनुरोध करटी रहल बाटी ।’
