बीउबिजन सम्बन्धी विद्येयक पारित
प्रदेशहे तीन बरसमे बीउबिजनमे आत्मनिर्भर बनैना
पहुरा समाचारदाता
धनगढी, २५ फागुन । सुदूरपश्चिम प्रदेशसभाके सोम्मारके बैठकमे ‘सुदूरपश्चिम प्रदेशके बीउबिजन सम्बन्धी व्यवस्था कैना बनल विद्येयक’ पारित हुइल बा ।
भूमि व्यवस्था, कृषि तथा सहकारी मन्त्री विनिता देवी चौधरी उ विद्येयक पारित कैना कहिके बैठकमे प्रस्ताव पेश करल रही । इहीसे आघे उ विद्येयक उपर बैठकमे हुइल छलफलमे प्रदेशसभा सदस्य बलबहादुर सोडारी, डिल्लीराज पन्त ओ मानबहादुर धामी भाग लेहल रहिट ।
छलफलके क्रममे उठल प्रश्नके जवाफ डेटी मन्त्री चौधरी आगामी तीन बरसमे प्रदेशहे टमान बालीके बीउबिजनमे आत्मनिर्भर बनैना सरकारके नीति रहल स्पष्ट पारल रही ।
बैठकके प्राम्भमे समसामयिक विषयमे बोले डेहल शून्य समयमे प्रदेशसभा सदस्य पूर्णा जोशी प्रदेशमे पाछेक डुइ बरस यहोर महिला तथा बालबालिका उपर हत्या, हिंसा जैसिन घटना बह्रटी गैल कहटी इ मेरके घटना हुइ नैडेना विगतमे मुख्यमन्त्रीसे साझा कानून लानक लाग करल प्रतिबद्धता कार्यान्वयन कैना ध्यानाकर्षण कराइल रही । उहाँ बैठकके विषेश समय ओ शून्य समयमे उठान हुइल विषयके सम्बोधन कैना फेन माग करल रही ।
प्रदेशसभा सदस्य शान्ति नेपाली प्रदेशमे दैनिक उपभोग्य सामग्रीमे बह्रटी गैल महंगी नियन्त्रण हुइ नैसेकके गरीब जनतामे पीडा थप्टी गैल कहटी महंगी नियन्त्रणमे पहल कैना माग करली । उहाँ महिलाउपर हुइटी रहल हिंसाके घटना रोक्न आवश्यक पहल कैना फेन सरकारके ध्यानाकर्षण कराइल रही ।
औरे सदस्य सुशीला बुढाथोकी इहे फागुन २२ गते धनगढीके फर्निचर उद्योगमे हुइल आगलागीसे धनमालके नोक्सानी हुइल कहटी पीडितहे राहत डेना ओ कैलाली जिल्लामे रहल हुलाकी राजमार्गके स्तरोन्नति कैना करैना ओर ध्यान डेना माग करली ।
सभामुख अर्जुनबहादुर थापासे विशेष ओ शून्य समयमे उठान हुइल विषय सम्बोधनके व्यवस्थाके लाग ‘रुलिङ’ करल रहिट ।
