महिला दिवसमे महिलनके साँसट
सोम्बारके १११ औं अन्तर्राष्ट्रिय महिला श्रमिक दिवस मनागइल । महिला दिवसके अवसरमे मेरमेरिक कार्यक्रम कैगइल । सरकारि आफिसमे आउर बरस महिला दिवसके अवसरमे महिलन किल विदा पाइट कलेसे अप्कि महिला दिवसमे पुरुस फे विदा पैलाँ । कहे नैपरि विदामे पुरुस या टे घुमे निक्रल हुइहि या संघरेनसे भेटभाट, महिलन उहे भाट भन्सक कामेम । बरसमे एकडिन अइना महिला दिवसके डिन फेन ठरवन अपन जन्निन पकाके खवाइल सुखद समाचार नैसुन्जाइठ । ओ ठरवन बर्बाराइट सुन्बो, इ जन्नि आज डिनभर घरे रहे टौन, कुछ नै करल । लुगालत्ता, भाँडाबर्टन, ढोवाइ, घरक सरसफाइहे ठरवन कामे नै गन्ठाँ । ठरवनके हाँठेम बरे मुस्किलसे घर बहारक लग बह्रनि डेख्बो । उल्टे गिट गइहि, उठो अलबेली बहारि डारो अंगना ।
अन्तर्राष्ट्रिय श्रमिक महिला दिवसके अवसरमे ‘महिलाके न्यायमे पहुँच सम्बन्धी प्रदेश स्तरीय’ अन्तरक्रिया कार्यक्रम धनगढीमे कइगैल बा । सामाजिक विकास मन्त्रालय एक्के सृष्टि, समदृष्टि, छावाछाई अक्के हुइट कना कार्यक्रम नन्ले बा । मन्त्रालयसे ‘मै छोट बटु बाह्रे डेउ, छोटेम भोज नाही पह्रे डेउ’ कना कार्यक्रम फे नन्ले बा । छावाछाई अक्के हुइट कना नारामे बा, मने व्यवहारमे नैहो ।
सुदूरपश्चिम प्रदेशमे १ हजार ६३, टमान मेरिक हिंसा पीडिट, बन्दाबन्दीके समयमे ४ सय ६३ ठो महिला घरभिटरसे हिंसामे परल बाट सार्वजनिक हुइल बा । यदि छावाछाई अक्के हुइट कना नारामे नाहि, व्यवहारमे बेलस जाइट कलेसे महिलन पीडिट हुइ नाइ पर्टिन ।
छोटेम भोज नाही पह्रे डेउ नारा अइलेसे फेन छाइ हालि भोज कैके डाइ बनल डेख्जाइठ । सेती प्रादेशिक अस्पतालके यशोदा ढकालके अन्सार उ अस्पतालमे रोटडिन हस ९÷१० जाने गर्भपतन करैटी बटाँ । ढेर जैसिन १७÷१८ बरसके लउण्डीन गर्भपतन करैटी बाटै । भु्रण हत्याफे एक मेरिक हिंसा हो । महिलनके हकमे कानून बन्ना मने प्रभावकारी कार्यान्वयनके अभावके कारन महिला हिंसाके घटनामे बृद्धि हुइटी गैल बा । जन्निनके कमाहि नै रलेसे ठरवनमे आत्मनिर्भर हुइ परठ, जिहिले घरेलु हिंसा आउर बह्रठ । उहेसे महिलन अपन सुरक्षा, सम्मानके लग फेन आम्दानी हुइना छोटबर कामेम लागक चाहि ।
महिला दिवसके रोज फे महिला आराम करे नै पैठाँ । चाहे जन्नि ठरवा अक्के पेशामे रहिट । भाटभान्सा जन्निके जो ठेक्का रठिन । महिला दिवसके रोज फेन महिलनके साँसट बिल्गाइठ, टब कहिया हुइ महिलनके सम्मान ? कसिक हुइ महिलनके विकास ?
