अस्थायी ट्राफिक प्रहरी पोष्टहे मोटरसाइकल

पहुरा समाचारदाता
सुखड, २५ फागुन । घोडाघोडी नगरपालिका वडा नम्बर २ साडेपानीमे रहल अस्थायी ट्राफिक प्रहरी पोष्टहे मोटरसाइकल हस्तान्तरण करल बा ।

नगरपालिकासे उपलब्ध कराइल १५० सिसी पल्सर मोटरसाइकलके चाबी नगर प्रमुख ममताप्रसाद चौधरी सोम्मारके रोज हस्तान्तरण करल रहिट । उहाँ सुदूरपश्चिम प्रदेश ट्राफिक प्रहरी प्रमुख एसपी बामदेव गौतमहे उ चाबी हस्तान्तरण करल हुइट । कार्यक्रममे ट्राफिक प्रहरी प्रमुख गौतम अब्बेक समयमे ट्राफिक व्यवस्थापन मुख्य चुनौतीके रूपमे रहल कहटी यहोर सबजे संवेदनशील हुइना आग्रह करल रहटि ।

अस्थाई ट्राफिक प्रहरी पोष्ट साडेपानीसे माग करल अनुसार घोडाघोडी नगरपालिका मोटरसाइकल डेना निर्णय करल रहे । कार्यक्रममे नगर उपप्रमुख प्रेमकुमारी थापा, प्रहरी, स्थानीय समाजसेवी वुद्धिजीवीहुक्रनके सहभागिता रहल रहे ।