एलपीएलः लिटल फ्लावर सेमिफाइनल प्रवेश

पहुरा समाचारदाता
धनगढी, २५ फागुन । लिटल फ्लावर स्कुल चण्डिका ग्रुप लिटल फ्लावर प्रिमियर लिग (एलपीएल) क्रिकेटके सेमिफाइनलमे प्रवेश करले बा । सोम्मारके हुइल खेलमे त्रिनगर स्कुलहे ७ विकेटसे पराजित कैटी लिटल फ्लावर सेमिफाइनलमे पुगल हो ।

संघीय प्रहरी इकाई कार्यालयके खेल मैदानमे त्रिनगरसे डेहल ६६ रनके लक्ष्य लिटलसे १० ओभर २ बलमे ३ विकेट गुमाके पूरा करल । लिटलके जितमे नरेन भट्ट ३० रन जोरेबर मनोज चनारा १६ रन बनाइल रहिट । निरज चन्द १३ रनमे अविजित रहलै ।

त्रिनगरके बसन्त थापा मगर २ तथा शिशिर थापा मगर १ विकेट लेहल रहिट । इहीसे आघे पहिले ब्याटिङ करल त्रिनगर १२ ओभर ५ बलमे अलआउट हुइटी ६५ रन बनाइल रहिट ।

ओम्ने रमेश विष्ट सर्वाधिक १३ रन बनाइल रहिट । लिटलके सचिन भट्ट ४ विकेट लेहल रहिट । मनोज चुनारा ओ नरेन भट्ट ३/३ विकेट लेहल रहिट । इ जितसंगे लिटल फ्लावर समूह ‘ख’ से सेमिफाइनलमे पुगल हो । इ समूहके तीन टिमके समान अंक हुइलपाछे नेट रन रेटके आधारमे लिटल फ्लावर सेमिफाइनलमे पुगल हो ।

इ समूहके लिटल फ्लावर, शारदा स्कुल ओ विद्या भुषण समान ४/४ अंक जोरल । मने, नेट रन रेटमे लिटल आघे रहल । प्रतियोगितामे १६ टिमके सहभागिता रहल बा । विजेता १ लाख २० हजार पैना बावै । ओस्टके उपविजेता ६० हजार प्राप्त करेबर सर्वोत्कृष्ट खेलाडी १० हजार पैना बाटै ।