महिला हिँसा न्यूनीकरण सम्बन्धी अन्तरक्रिया
पहुरा समाचारदाता
धनगढी, २५ फागुन । १११ औं अन्तर्राष्ट्रिय महिला दिवसके अवसरमे सोम्मारके रोज धनगढीमे समानता ओ महिला हिँसा न्यूनीकरणमे विद्यार्थीके भूमिका सम्बन्धी अन्तरक्रिया कार्यक्रम निम्जल बा ।
धनगढी उपमहानगरपालिका ओ सरस्वती माविके सहकार्यमे सुरक्षित मातृत्व संजाल महासंघ नेपालके आयोजनामे कार्यक्रम हुइल रहे ।
विद्यालयके छात्रछात्राहुकनहे लैंगिक समानता, महिला हिंसा न्यूनीकरणमे विद्यार्थीके भूमिकाके सम्बन्धी सचेतना जगैना उद्देश्य उ कार्यक्रम आयोजना करल महासंघके प्रदेश संयोजक राजेन्द्र रैका बटैलैं ।
प्रमुख अतिथि धनगढी उपमहानगरपालिकाके उपप्रमुख सुशीला मिश्र भट्ट रहल कार्यक्रममे संस्थाके कोषाध्यक्ष डण्डीराज सुवेदी महिला अधिकार सम्बन्धमे सहजीकरण करले रहिट ।
कार्यक्रममे शिक्षक चन्द्रकला दवाडी, रिता ज्ञवाली, विद्यार्थी प्रियंका पाठक लगायत मन्तव्य व्यक्त रहले रहिट ।
अस्टेक संजाल ओ नगरबाल संजाल धनगढीके संयुक्त आयोजनामे महिला तथा बालबालिका हिंसा न्यूनीकरण सम्बन्धी प्रभातफेरी एंव सचेतनामूलक सडक नाटक प्रस्तुत करल रहे ।
अस्टेक, धनगढी उपमहानगरपालिकाके धुर्झन्ना मुक्त कमैया वस्तीमे फेन अन्तर्राष्ट्रिय महिला दिवस मनागिल बा । संविधानसभा सदस्य हरि श्रीपाई उद्घाटन करल कार्यक्रममे सीमा चौधरी, नारायण चौधरी, सीताराम चौधरीलगायत मन्तव्य व्यक्त करले रहिट ।
कार्यक्रम मुक्त कमैया महिला विकास मञ्चके अध्यक्ष कौशिल्या चौधरीके अध्यक्षतामे हुइल रहे ।
