जेठ १३ गतेसे एसईई परीक्षा
काठमाडौँ, २५ फागुन । २०७७ सालके माध्यमिक शिक्षा परीक्षा (एसईई) परीक्षा अइना जेठ १३ गतेसे सञ्चालन हुइना हुइल बा ।
राष्ट्रिय परीक्षा बोर्डके बैठकसे जेठ १३ गतेसे २४ गतेसम परीक्षा सञ्चालन कैना निर्णय करल बोर्ड सदस्य सचिव दुर्गाप्रसाद अर्याल जानकारी डेलै । अइना एसईई राष्ट्रिय परीक्षा बोर्डसे नै लेना बा ।
गैल २६ माघमे बैठल मन्त्रिपरिषद् बैठकसे एसईई परीक्षा पुनः बोर्डसे नै लेना निर्णय करल रहे । ‘विद्यालय शिक्षाके शैक्षिक सत्र तथा वार्षिक परीक्षा सञ्चालन ओ व्यवस्थापन कैना सम्बन्धमे माध्यमिक शिक्षा (कक्षा १०) के एसईई परीक्षा सम्बन्धमे प्रदेश सरकारसे आवश्यक सहकार्य कैके राष्ट्रिय परीक्षा बोर्डसे साविक बमोजिम परीक्षा सञ्चालन, व्यवस्थापन, नतिजा प्रकाशन ओ प्रमाणीकरण कैना प्रबन्ध मिलैना’ मन्त्रिपरिषद्के निर्णयमे उल्लेख बा ।
गैल बरस कोभिड–१९ के महामारीके कारण विद्यालयसे करल आन्तरिक मूल्यांकनके आधारमे ग्रेड निर्धारण कैके नतिजा प्रकाशित करल रहे । मुलुक संघीयतामे गैलपाछे एसईई परीक्षाके व्यवस्थापन, सञ्चालन, अनुगमन, उत्तरपुस्तिका खरीदलगायतके सक्कु कामके जिम्मा प्रदेश सरकारसे पाइल रहे ।
यद्यपि कानूनके अभावमे आभिनसम फेन कक्षा १० के एसईई परीक्षा राष्ट्रिय स्तरमे सञ्चालन हुइटी आइल बा । एसईईके परीक्षा प्रदेशस्तरसे सञ्चालन करे पर्र्ना व्यवस्था रलेसे फेन सरकारसे इ सम्बन्धी स्पष्ट कानून बनाइ सेकल नैहो ।
संविधानसे माध्यमिक शिक्षासमके अधिकार स्थानीय सरकारहे डेले बा कलेसे शिक्षा नीतिमे फेन कक्षा १० के परीक्षा प्रदेश मातहत राखल बा ।
