हिमालयन ह्वाइट हाउस सेमिफाइनलमे

पहुरा समाचारदाता
धनगढी, २५ फागुन । धनगढीमे जारी लिटल फ्लावर प्रिमियर लिग (एलपियल) मे काठमाडौँके हिमालय ह्वाइट हाउस सेमिफाइनलमे प्रवेश करले बा । मंगरके रोज हुइल दुसरा खेलमे काठमाडौँके नेक्सस स्कुलहे ४ विकेटसे पराजित करटी ह्वाइट हाउस अन्तिम चारमे प्रवेश करल हो ।

टस जिटके पहिले ब्याटिङ करल नेक्सससे १९ ओभर ५ बलमे सक्कु विकेट गुमैटी १ सय ४ रन बनाइल । ओकर लाग उत्तम थापा ३२ रन बनैलै । बलिङओर ह्वाइट हाउसके गजेन्द्र बोहरासे ५ विकेट लेलै । १ सय ५ रनके विजयी लक्ष्यसहित मैदानमे उत्रल ह्वाइट हाउससे १५ ओभरमे ६ विकेट गुमैटी लक्ष्य भेट्टाइल । ह्वाइट हाउसके जितमे दीपक बोहरा अविजित रहटी ४३ रन बनाइल ।

नेक्ससके पप्पु रायसे ३ विकेट लेहल । खेलके म्यान अफ द म्याच ह्वाइट हाउसके गजेन्द्र बोहरा हुइलै । यी संगे प्रतियोगितामे सेमिफाइनलमे पुग्न तीन टीमके टुङगो लागल बा । यी आघे बाल बाटिका ओ लिटल फ्लावर अन्तिम चारमे प्रवेश करसेकल बटै ।

ओस्टेक मंगर हुइल दुसरा खेलमे शारदासे स्टेपिङ स्टोन बोर्डिङ स्कुलहे ५६ रनसे हराइल हो । शारदासे डेहल १ सय १७ रनके लक्ष्य पछ्याइल स्टेपिङसे १४ ओभर ३ बलमे सक्कु विकेट गुमैटी केल ६० रन बनाई सेकल । स्टेपिङके लाग विशाल बिष्ट १७ ओ अभिषेक कुँवरसे १६ रन बनैना बाहेक और खेलाडी दुसरा अंकमे रन छुए नइसेकल । स्टेपिङहे सस्तामे समेट्न शारदाके लाग विकास सुनार ओ गणेश बहादुर समान ४–४ विकेट लेलै ।

यी आघे पहिल ब्याटिङ करल शारदासे २० ओभरमे ९ विकेट गुमाके १ सय १६ रन जोरल रहे । शारदाके लाग सुदिप रोकायासे ३४ रन जोरलै । उहाँ ३५ बलमे चार चौका ओ एक छक्काके मद्दतमे ३४ रनके योगदान डेहल रहिट । ओस्टेक सागर चन्द २६ रनके योगदान डेके और ब्याट्सम्यानसे दोहोरो अंक जोरे नइसेक्लै । बलिङओर स्टेपिङके लाग अभिषेक कुँवर, रोमन बिष्ट ओ प्रवेश साउँद समान २÷२ विकेट लेलै ।