सेमिफाइनल समिकरण पूरा

पहुरा समाचारदाता
धनगढी, २६ फागुन । धनगढीमे जारी विद्यालयस्तरीय राष्ट्रिय क्रिकेट प्रतियोगिता चण्डिका ग्रुप लिटल फ्लावर प्रिमियर लिगमे सेमिफाइनल समिकरण पूरा हुइल बा ।

बुधके रोज हुइल खेलपमे होलिल्याण्ड स्कुलहे पराजित करटी कञ्चनपुरके शारदा सरस्वती अन्तिम चारमे स्थान पक्का बनाइलपाछे सेमिफाइनल समिकरण पूरा हुइल हो ।

बुधके हुइल लिग चरणके अन्तिम खेलमे शारदा सरस्वती होलिल्याण्ड स्कुलहे २२ रनसे पराजित करल । टस हटके ब्याटिङके न्यौटा पाइल शारदा सरस्वती निर्धारित २० ओभरमे ७ विकेट गुमाके १ सय ४८ रन बनाइल । ओकर लाग गणेशबहादुर बिटालु अविजित रहिके ५८ रन बनैलैं । होलिल्याण्डके राहुल भण्डारी ३ विकेट लेनैं ।

१ सय ४९ रनके विजयी लक्ष्यसहित मैदान उत्रल होलिल्याण्ड २० ओभरमे सब विकेट गुमाके एक सय २६ रन किल बनाइ सेकल । ओकर लाग मनोज ओझा ४५ रन बनैले फेन अपन टीमहे जिताइ नैसेक्लैं ।

शारदा सरस्वतीके जितमे निरज चन्द ३ ओ विकास सुनार २ विकेट गिरैलैं । खेलके म्यान अफ द म्याच शारदाके गणेशबहादुर बिटालु बन्लैं ।

यीआघे धनगढीके लिटल फ्लावर, बौनियाके बाल बाटिका ओ काठमाडौँके हिमालयन ह्वाइट हाउस प्रतियोगिताके सेमिफाइनलमे प्रवेश करसेकले बाटैं ।

२८ गते हुइना पहिल सेमिफाइनलमे शारदा सरस्वती ओ हिमालयन ह्वाइट हाउस भिरही कलेसे दोसर सेमिफाइनलके खेल लिटल फ्लावर ओ बाल बाटिकाबीच हुइ ।

लिटल फ्लावर स्पोर्टस एन्ड इभेन्टसके आयोजनामे धनगढीके संघीय प्रहरी इकाई कार्यालयके खेल मैदानमे हुइटीरहल पाँचौ संस्करणके प्रतियोगिताके फाइनल २९ गते हुइ ।

प्रतियोगिताके विजेता एक लाख २० हजार नगदसहित ट्रफी ओ प्रमाणपत्र पाइ कलेसे उपविजेता ६० हजार प्राप्त करी ओ सर्वोत्कृष्ट खेलाडी १० हजार पैहीँ । अस्टेक उत्कृष्ट ब्याट्सम्यान, बलर ओ उदीयमान खेलाडीहे जनही ५÷५ हजार प्रदान करजाइ । म्यान अफ दि म्याच १ हजार ५ सय पैहीँ ।