बेहडाबाबा धामके मुख्य प्रवेशद्वारके उद्घाटन
पहुरा समाचारदाता
धनगढी, २७ फागुन । कैलाली जिल्ला धनगढीके प्रमुख धार्मिक तथा पर्यटकीय स्थल बेहडाबाबा धाममे मुख्य प्रवेशद्वार बिफेक रोज शिवरात्रिके अवसरमे उद्घाटन करल बा ।
अर्थ मन्त्रालयके सचिव शिशिर ढुंगाना ओ धनगढी उपमहानगरपालिकाके नगरप्रमुख नृपबहादुर वड एक समारोहके बीच प्रवेशद्वारके उद्घाटन करले रहिट ।
उद्घाटन कार्यक्रममे अर्थ सचिव ढुंगाना बेहडाबाबा धामके विकासके लाग स्थानीय सरकारसे करल कामके प्रशंसा करलैं । मजा विकास हुइल बा, अर्थ सचिव ढुंगाना कलैं, ‘मै फेन उपमहानगरपालिकासे बनाइल गुरुयोजना अन्सार सहयोगके लाग पहल करम ।’
बेहडाबाबा धाम क्षेत्रमे उपमहानगरपालिका तयार करल गुरुयोजना अन्सार पूर्वाधार विकासके काम धामाधम हुइटीरहल, नगरप्रमुख नृपबहादुर वड कलैं, दर्शन करे अइना भक्तजनके सहजिलके लाग सुविधा सम्पन्न धर्मशाला निर्माण हुइटा ।
मन्दिरके सुरक्षाके लाग ४ करोड बराबरके वरपर पर्खाला निर्माणके काम हुइटीरहल नगरप्रमुख वड जानकारी डेलैं । मन्दिरसे गंगामाता मन्दिर सम पुगेक लाग छोटडगर निर्माण हुइटा, नगरप्रमुख वड कलैं, मन्दिर परिसर छेउछाउके खालि भागमे पुष्प बगैचा निर्माण करले बाटी ।
नगरप्रमुख वड बेहडाबाबा मन्दिर वरपर चक्रपथ निर्माणके कार्य निम्जल बटैलैं । उहाँ कलैं, खानेपानी सौचालय निर्माणके काम समेत पुरा हुइल बा ।
धनगढी उपमहानगरपालिकाके बेहडाबाबा मुख्य धार्मिक तथा पर्यटकीय क्षेत्र हुइल ओरसे यकर प्रचारप्रशार आवश्यक रहल बटैलैं । उहाँ कलैं, धनगढी पुगुइया हरेक व्यक्तिहे बेहडाबाबा पुगैना वातावरण बनाइपरल । यिहे बीच बेहडाबाबाके विकासमे योगदान करुइया टमान व्यक्तिहुकनहे सम्मान करल रहे ।
