मेयर कपके उपाधि आयोजक एसपिएहे
पहुरा समाचारदाता
धनगढी, २९ फागुन । धनगढीमे हुइल मेयर एसपिए कप भलिबल प्रतियोगिताके उपाधि आयोजक सुदूरपश्चिमाञ्चल एकेडेमी एसपिए जिट्ले बा । शनिच्चर हुइल फाइनलमे अत्तरियाके दुर्गालक्ष्मी माविहे हटाके एसपिए च्याम्पीयन बनल हो ।
सुदूरपश्चिमाञ्चल एकेडेमीके आयोजना तथा धनगढी उपमहानगरपालिकाके सहयोगमे हुइल छात्रा भलिबल प्रतियोगिताके उपाधि भिडन्तमे धनगढीके एसपिए अत्तरियाके दुर्गालक्ष्मीहे वेष्ट अफ फाईभमे ३–० के सोझे सेटमे पराजित करल हो ।
एसपिए दुर्गालक्ष्मीहे २५–१९, २६–२४ ओ २५–१२ के स्कोरसे हटैटी नगद ५० हजार सहित ट्रफी मेडल ओ प्रमाणपत्र पैले बा । उपविजेता दुर्गालक्ष्मी मावि नगद २५ हजार सहित ट्रफी मेडल ओ प्रमाणपत्र प्राप्त करल ।
प्रतियोगितामे शान्ति मावि तेसर हुइल बा । शान्ति मावि दीपेन्द्र चापपाते माविउप्पर ३–० के सोझे सेटके जित हात पारल हो । तेसर स्थानके लाग हुइल खेलमे शान्ति मावि दीपेन्द्र चारपातेहे २५–१६, २५–६ ओ २५–७ के स्कोरमे हटाके नगद १५ हजार सहित ट्रफी मेडल ओ प्रमाणपत्र प्राप्त करले बा ।
तीन दिनसम धनगढीमे सञ्चालन हुइल मेयर एसपिए कप छात्रा भलिबल प्रतियोगितामे एसपिएके गरिमा बोहोरा प्लेयर अफ द टुर्नामेन्ट हुइली । अस्टेक एसपिएके राधिका ऐर वेष्ट स्पाईकर, एसपिएके निर्मला ओझा वेष्ट डिफेन्डर ओ एसपिके निर्मला वोहोरा वेष्ट सर्भर बन्ली । दुर्गालक्ष्मीके पुष्पा धामी वेष्ट सेटर बन्ली । प्रतियोगिताके विजयी खेलाडीहुकनहे एक कार्यक्रमके बीच पुरस्कार वितरण करल रहे ।
आयोजक सुदूरपश्चिमाञ्चल एकेडेमीके क्याम्पस प्रमुख कटकबहादुर अप्रेलके अध्यक्षतामे हुइल कार्यक्रमके प्रमुख अतिथि वडा नम्बर ४ के वडाध्यक्ष दीपक थापा रहिट । प्रतियोगितामे कैलालीके आठ ठो टीम भाग लेले रहे ।
