एलपिएलके उपाधि हिमालयन ह्वाइट हाउसहे
पहुरा समाचारदाता
धनगढी, २९ फागुन । पाँचौ संस्करणके लिटल फ्लावर प्रिमियर लिगके उपाधि हिमालयन ह्वाइट हाउस काठमाडौँ जिटले बा । फाइनलमे साविक विजेता समेत रहल धनगढीके लिटल फ्लावर स्कुलहे ८० रनसे पराजित करटी ह्वाइट हाउस च्याम्पियन हुइल हो ।
धनगढीस्थित संघीय प्रहरी कार्यालयके खेल मैदानमे हुइल फाइनल खेलमे टस जिटके पहिले ब्याटिङ करल ह्वाइट हाउससे निर्धारित २० ओभर ९ विकेट गुमैटी १ सय ६७ रन बनाइल । ओकर लाग गजेन्द्र बोहरासे ७० ओ सतिश यादव २९ रन बनैलै ।
लिटल फ्लावरके राज कुमार शाह ५ विकेट लेलै । १ सय ६८ रनके विजयी लक्ष्यसहित मैदानमे उत्रल घरेलु टोली लिटल फ्लावरसे १७ ओभर ३ बलमे सक्कु विकेट गुमैटी ८७ रन बनाई सेकल ।
लिटल फ्लावरके लाग निशान्त बुढाऐर १७ ओ पुष्करराज बडु अविजित रहटी १४ रन बनैलै । ह्वाइट हाउसके प्रतिश जिसी ३ ओ स्वरुप श्रेष्ठसे २ विकेट लेलै । म्यान अफ द फाइनल ह्वाइट हाउसके गजेन्द्र बोहरा चुन्लै । उपाधिसंगें ह्वाइट हाउससे नगद १ लाख २० हजारसहित ट्रफी प्राप्त करले बा लिटल फ्लावर ६० हजारमे चित्त बुझैले बा ।
प्रतियोगिताके सर्वोत्कृष्ट खेलाडी ह्वाइट हाउसके गजेन्द्र बोहरा हुइलै । उहाँ नगद १० हजार पैलै । ओस्टेक शारदा विद्या निकेतनके दिनेश ओड उत्कृष्ट ब्याट्सम्यान, ह्वाइट हाउसके सन्दिपजंग शाही उत्कृष्ट बलर ओ लिटल फ्लावरके सचिन भट्ट उदयमान खेलाडी हुइलै ।
ओइने ५/५ हजार प्राप्त करलै । लिटल फ्लावर स्पोर्टस एण्ड इभेन्ट्सके आयोजनामे १५ फागुनसे सुरु हुइल प्रतियोगितामे देशभरके १६ टीमके सहभागिता रहल रहे । दुसर बर्ष अभिन परस्कृत रुपमे प्रतियोगिता आयोजना हुइना आयोजक संस्थाके अध्यक्ष रामचन्द्र शाही जानकारी डेलै ।
