सेतीमे जेष्ठ नागरिकके उपचारमे ५० प्रतिशत छुट
पहुरा समाचारदाता
धनगढी, ०१ चैत । सुदूरपश्चिमके दुई अस्पतालमे ६० बरस उप्पर ज्येष्ठ नागरिकहे उपचार तथा स्वास्थ्य सेवामे ५० प्रतिशत छुट डेहे पर्ना व्यवस्था करले बा ।
प्रदेशके धनगढीमे रहल सेती प्रादेशिक अस्पताल ओ डडेल्धुरा अस्पतालमे ६० बरस उप्परके ज्येष्ठ नागरिकहे उपचार तथा स्वास्थ्य सेवामे ५० प्रतिशत छुट हुइना हुइल हो ।
स्वास्थ्य तथा जनसंख्या मन्त्रालयसे जारी करल जेरियाट्रिक (ज्येष्ठ नागरिक) स्वास्थ्य सेवा सञ्चालन निर्देशका २०७७ से ज्येष्ठ नागरिकहे अस्पताल व्यवस्थापनसे तोकल बमोजिमके निश्चित सेवामे ५० प्रतिशत छुट डेहे पर्ना व्यवस्था करल हो ।
अस्पतालसे उपलब्ध कराइल वार्ड वा शय्याके प्रयोग नैकैके प्राइभेट वार्ड वा क्याबिनमे बैठके उपचार कराइबर लागल खर्चमे भर कौनो छुट सुविधा नैहुइना जनाइल बा । सरकारसे आर्थिक बरस २०७७–७८ सम जेरियाट्रिक ज्येष्ठ नागरिक स्वास्थ्य सेवा सात प्रदेशमे कैके २४ ठो अस्पतालमे इ सेवा सुरु हुइल हो ।
