यातायात व्यवसायीनसे ढेर असुल
पहुरा समाचारदाता
धनगढी, ०१ चैत । कैलालीके धनगढीसे नेपाली यातायात व्यवसायीहुक्रे भारतके टमान सहरमे यातायातके सेवासुविधा डेटी आइल बाटै ।
भारतीय यातायात व्यवसायीनसे लुट्वा पैना, पिट्वा पैना गुनासो आइलपाछे नेपालके ढिउर यातायात व्यवसायी धनगढीसे भारतके टमान शहरमे सेवा सुरु करल हुइट । मने, भारतमे
मजदुरी करटी आइल नागरिकहुक्रे अपने नेपाली डाडुभैयाहुक्रनसे ठग्वा पैना गुनासो करले बाटै ।
टमान बहानामे यातायात व्यवसायीहुक्रे दुःख डेना करल अछाम बान्नीगढी जयगढ गाउँपालिका–६ के पदम थापा बटैलै । ‘पाछेक समयमे धनगढीसे ढिउर यातायात भारतके टमान सहरमे पुगठ्,’ उहाँ कहलै, ‘ओइनके नियत फेन ठीक नैहो ।’
इहे फागुन २३ गते भारतके पुनासे छ्टल बसमे मध्यप्रदेश ओ राजस्थान बोर्डरमे चोरी हुइल थापा बटैलै । पुनासे छुटल ४९५० नम्बरके बागेश्वरी टुर्स ट्राभल्सके बसमे ५ लाख बराबरके सामग्री गाडी चालकके संलग्नतामे लुटल उहाँ आरोप लगैलै । उ बसमे थापा लगायत ६ जनहनके धनमाल चोरी हुइल हो । हिक्मत थापा, महेन्द्र विष्ट लगायत ६ जनहनके धनमाल चोरी हुइल हो ।
‘दिनेश खत्री ओ विष्णु जोशी आपन डिलक्स बसमे सुरक्षित साथ धनगढी पुगाब कहटी गाडी नम्बर ४९५० मे पुनासे बैठल रही,’ बसमे सामान लुटल औरे व्यक्ति हिक्मत थापा कहलै । भारतके पुनासे गौरीफण्टासमके भाडा १ हजार ६०० रुपैयाँ भारु रलेसे फेन २ हजार ३०० रुपैयाँ लेहल उहाँ बटैलै ।
धनमाल चोरी हुइल कहटी चोरीमे संलग्नहुक्रनहे आवश्यक बारवाहीके लाग जिल्ला प्रहरी कार्यालय कैलालीमे निवेदन समेत डेहल नागरिक तथा शान्ति समाज नेपालके मदन बहादुर कुँवर बटैलै । उहाँ नेपाली यातायात व्यवसायीनसे घरी घरी ठग्वा पैना करल बटैलै ।
‘भारतके टमान शहरसे अइना क्रममे नेपालीहुक्रनहे तोकलसे ढिउर भाडा लेना, आर्थिक मानसिक ओ भौतिक पीडा समेत डेना करल बाटै् ।’ कुँवर कहलै, ‘नेपाली यातायात व्यवसायीसे यात्रु रुष्ट बाटै । यम्ने सरोकारवाला निकायके ध्यान जैना आवश्यक बा ।’
धनगढी बसपार्क, भन्सार रोड ओ दशगजामे रहल डोके बजारसे सञ्चालित टमान नेपाली ट्राभल्स एजेन्सी नै नेपाली कामदारसे ढिउर रकम असुल्ना करल बाटै । आ्स्टके यात्रुनहे डगरामे अलपत्र पर्ना ओ ठग्ना करल बाटै । कुछ महिना आघे धनगढी बसपार्कस्थित बर्ददेवी टुर एन्ड ट्राभल्सके टिकटमे भारतीय बस व्यवसायी लैजाइ नैमानलपाछे नेपाली कामदार बीच डगरामे अलपत्र
परल रहिट ।
भारतसे अउइया किल नैहोके जउइया समेतहुक्रनके गुनासा अइना जिल्ला प्रहरी कार्यालय कैलालीके प्रहरी नायव उपरीक्षक प्रतीक विष्ट बटैलै । एजेन्सीहुक्रे बसपार्क ओ टमान जिल्लासे अउइया बसमे नेपाली कामदारहे सम्पर्क कैके भारत पठैना करल खुलल जानकारी डेलै ।
‘पाछेक समय टे गाउँगाउँसम एजेन्सी आपन सञ्जाल बिस्तार करसेकल बाटै,’ डिएसपी बिष्ट कहलै, ‘उहाँहुक्रनहे नेपालमे टिकटके भाडा उठाके पठैना करल बाटै ।’
विष्टका अनुसार एजेन्सीहुक्रे यात्रु औरेक सम्पर्कमे आइक डरे होटलमे नुकाके रख्ना, होटलमे टिकट काटडेना ओ औरे दिन सिधे नाका कटाके बसमे बैठैना करल समेत पाइल बटैलै ।
सुदूरपश्चिम ओ कर्णाली प्रदेशके अधिकांश नागरिक रोजगारके लाग भारत जैना करल बाटै । स्वदेशमे रोजगारीके अवसर नैपाके बाध्य होके नेपाली नागरिक भारतमे रोजगारीके लाग जैना करल हुइट ।
