भन्सार छलीके अवैध सामान बरामद

पहुरा समाचारदाता
धनगढी, १ चैत । भारतसे चोरी पैठारी हुइटी रहल भन्सार छलीके अवैध सामान प्रहरी बरामद करले बा ।

अँटवारके सकारे साढे ११ बजेक समयमे यी कार्यालयसे खटल प्रहरी टोली जिल्ला कैलाली धनगढी उपमहानगरपालिका वडा नम्बर १ स्थित सडकखण्डमे भारतसे अवैध भन्सार चोरी पैठारी हुइटी रहल सूचनाके आधारमे बेबारिसे अवस्थामे सामान बरामद करल जिल्ला प्रहरी कार्यालय कैलालीके प्रवक्ता प्रतिक विष्ट बटैलै ।

बरामद करल सामानमे सुटपिस १७०, सेतो कुर्ती ९० पिस, पाउडर ११५ दर्जन, कोटके अस्तर ४ पोका, कपडा थान १ रोल लगायत अन्दाजी मोल १ लाख १८ हजार नौ सय बराबरके सरसमान फेला पाके आवश्यक कारबाहीके लाग अँटवार त्रिनगर भन्सार कार्यालय कैलालीमे पठाइल बा ।

ओस्टेक जिल्ला प्रहरी कार्यालय कैलालीसे खटल प्रहरी टोली भन्सार छलीके चिनी लुगा कपडा बरामद करले बा । फागुन २९ गते धनगढी उपमहानगरपालिका वडा नम्बर १९ खेदास्थित भन्सार छलके नन्टी रहल अवस्थामे ३० बोरा चिनी, मोबिल, प्लाष्टिकके डोरी अन्दाजी १ लाख ७ हजार १ सय मोल बराबरके बेबारिसे अवस्थामे फेला परल सामान आवश्यक कारवाहीके लाग त्रिनगर भन्सार कार्यालय कैलालीमे पठाइल प्रवक्त विष्ट बटैलै ।

लागु औषध सहित एक पक्राउ

ओस्टेक फागुन २९ गते साँझके अन्दाजी साढे चार बजे सुदूरपश्चिम प्रदेश प्रहरी कार्यालय दिपायल ओ जिल्ला प्रहरी कार्यालयसे खटल प्रहरी टोली कैलालीके कैलारी गाउँपालिका–७, रामपुरस्थित प्लाष्ट्रिकके कट्टा बोक्के शंकास्पद रुपमे नेग्टी रहल अवस्थामे उहे बैठना बर्ष ४८ के रामबिलाश चौधरीहे लागु औषध सहिट पक्राउ करल रहे ।

रामबिलाशहे रोक्के चेकाजाँच करेबेर हुकानठेनसे कट्टाभित्तर क्लोर्फेनिर्यमाइन मेल्टेड एण्ड कोडाइन पोष्पाट सिरप लिखल लागु औषध सिसि थान–४० फेला पारके बरामद करल प्रवक्ता जनैलै । राम बिलाश चौधरीहे लागु औषध शिर्षकमे मुद्दा दर्ता करके सम्मानित कैलाली जिल्ला अदालतसे म्यादथप अनुमति लेके ठप अनुसन्धान हुइटी रहल प्रहरी जनैले बा ।