थाकस ओ भातृसंगठनके सक्रियता
इहे सनिच्चरके थारु कल्याणकारिणी सभा (थाकस) के भातृसंगठन थारू महिला सभाके सुर्खेत शाखा गठन हुइल समाचार बा । सुर्खेतमे थाकस सबसे पाछे गठन हुइल शाखा हो । उहे क्रममे थारू महिला सभाके गठन फेन सुर्खेतमे बहुट पाछे हुइल बा ।
थाकसके महिला लगायट विद्यार्थी, युवा, वकिल लगायट मेरमेरिक भातृसंगठन बटिस । मने इ भातृसंगठन गठनके नाउँमे गठन किल हुइहस बिल्गाइठ, कौनो सक्रियता नै बिल्गाइठ । हुइना टे मुँरि याने कि थाकस अपने स्वयम् सक्रिय नै रहि कलेसे ओकर भातृसंगठन सक्रिय हुइना बाटे नै आइल ।
थाकसके केन्द्रिय अध्यक्ष धनीराम चौधरीके नाउँ फेन टीकापुर घटनामे मुँछ गइल बा । उ अदालतके नजरमे फरार अपराधी हुइटै । टीकापुर घटनामे मुँछल कारन सहानुभुटि भोट स्वरुप थाकसके गइल अधिवेसनमे उ फेन डोसर फेरा केन्द्रिय अध्यक्षमे राजकुमार लेखीहे हटाके जिटल रहिट । मने कौनो योजना बनाइ नैसेक्के, उपाध्यक्षहे कार्यबाहक अध्यक्ष नैडेके थाकसहे पंगु बना डेलै । मोर नाउँमे वारेन्ट जारि बा कहिके अपने सार्वजनिक नै हुइना ओ रलक पदाधिकारिन परिचालन करे नै सेक्ना संयोजकके ओर्से भारि कमजोरि हुइटि बा ।
अब्बे टीकापुर घटनामे जोर गइल सांसद रेशम चौधरीक रिहाइके प्रसंग चर्चामे बा । मने उहे घटनम अपन केन्द्रिय अध्यक्षके नाउँ मुँछ गइलमे फेन थाकसके इ घटनाबारे ना कोनो छलफल, ना उठकबैठक, ना दवाव, ना एकठो विज्ञप्ति डेहे सेक्ना भारि विडम्वनाके बाट हो । असिन लागठ, केन्द्रमे थाकस बा कि नैहो ?
जिल्ला जिल्लामे थाकस शाखा जट्रा सक्रिय बा, उ केन्द्रके निर्देशनसे नाहि बल्कि अपन बलबुटासे काम कर्टि बाटै । भर्खर संघिय राजधानी काठमाडौंमे थारु आयोग थारु थर सुचिकरन सार्वजनिक करल । थारु थर सुचिकरनके लग खटल बहुट जिल्लक् अनुसन्धानकर्तन अपने जिल्ला तहके थाकससे सहयोग नै पाइल गुनासो कर्ले रहै ।
कौनो फेन जातिय संस्थाके गतिविधि पछ्गुरना कलक सर्जे उ जाति पछ्गुरना हो । उहेसे जिल्ला तहमे रहल थाकस अपने सक्रिय हुइना टे पर्ले बा । केन्द्रहे फेन घच्घच्यइना ओटरे जरुरि बा । थारु नागरिक समाज फेन थाकसके सक्रियतामे ध्यान डेहे ।
