‘समाज आघे बह्रैना महिला सशक्तीकरण’
पहुरा समाचारदाता
धनगढी, २ चैत । सभा नेपाल कैलालीके आयोजनामे सोम्मारके रोजसे धनगढीमे ३ दिने नेतृत्व, लैंगिकता ओ स्थानीय स्तरमे सहभागिता विषयक अभिमुखीकरण कार्यक्रम सुरु हुइल बा ।
कार्यक्रमके धनगढी उपमहानगरपालिकाके प्रवक्ता तथा वडा नम्बर १ के वडाध्यक्ष सन्तोष मुडभरी उद्घाटन करले रहिट । कार्यक्रममे प्रवक्ता मुडभरी आपन सिखल सीप, लेहल तालिम व्यवहारमे उटारे परना बटैले रहिट । ओस्टक, आपन ज्ञान, सीपहे औरे जहनसँग बट्लेसे किल सिखल ज्ञान सार्थक हुइना उहाँक कहाइ रहे । उहाँ कलैं, ‘जबसम समाजमे महिलाहुकनके सशक्तीकरण करे नैसकब टबसम हमार समाज आघे बह्रै नैसेकी, टबमारे समाजमे तालिम, सीप, ज्ञानहे बह्रावा डेहे परठ ।’
अस्टेक कार्यक्रममे सप्र्राेस नेपालके संयोजक चन्द्रबहादुर सिंह स्थानीय उत्पादनहे विद्यालयमे आवश्यक परना खाजाके उत्पादनसे जोरे परनामे जोड डेले रहैं । उहाँ विद्यालयमे विद्यार्थीनके लाग चाहना खैना चिज स्थानीय स्तरमे उत्पादन हुइल वस्तुके उपयोग करे सेक्लेसे उद्यममे लागल महिलाहे फेन फाइदा हुइना ओ विद्यार्थीन्के स्वास्थ्यमे सकारात्मक प्रभाव परना बटैलैं ।
सभा नेपालके सीईओ रविनमान अमात्यके अध्यक्षतामे हुइल कार्यक्रममे सहजीकरण संस्थाके जिल्ला कार्यक्रम संयोजक दलबहादुर ओली करले रहिट ।
कैलाली जिल्लाके तीन ठो स्थानीय तहमे लागू हुइल उ कार्यक्रममे छ सय ५० जाने महिला आवद्ध बटैं । अभिमुखीकरण कार्यक्रममे मीना चौधरी, प्रतिभा रिजाल, जयमति चौधरी, रूपा चौधरी सहजीकरण करटै ।
