‘अद्भूत इन्द्रेनी’ के लोकार्पण
पहुरा समाचारदाता
धनगढी, ३ चैत्र । सिद्धार्थ शिशु सदन स्कुल धनगढीमे कक्षा ९ मे अध्ययनरत बाल कवि बिभुति अधिकारीसे लिखित छन्दोबद्ध खण्डकाव्य ‘अद्भूत इन्द्रेनी’ के लोकार्पण हुइल बा ।
कैलाली जनपुस्तकालयसे धनगढीमे आयोजित समारोहमे नेपाल प्रज्ञा प्रतिष्ठानके प्राज्ञ डा. देवी नेपाल उक्त खण्डकाव्यके लोकार्पण करल रहिट । कृति लोकार्पण कैटी बर्का पहुना प्राज्ञ डा. नेपालसे १४ वर्षिय बालक बिभुति अधिकारीसे शास्त्रीय छन्दमे लिखल इ कृति बिभुतिहे जात्तिक बिभुति बनाइल चर्चा करलै ।
सम्भबतः अटरा छोट उमेरमे छन्दबद्ध खण्डकाव्य लिखुइया नेपालमे उहाँ पहिल कवि हुइ सेक्ना बटैटी ओहकान अद्भुत क्षमताके प्रशंसा करलै ।
कार्यक्रममे कैलाली जनपुस्तकालयके अध्यक्ष संस्कृतिविद् डा.टीएन जोशी बिभुति अधिकारीमे बिलक्षण प्रतिभा रहल बटैटी ओहकान कृति उत्कृष्ट काव्य रहल बटैलै । उहाँ कहलै, ‘सुदूरपश्चिमसे काव्यके दीया बरल बा । बिभुतिके प्रतिभाहे राज्य कदर करे परल ।’
कार्यक्रममे महाकाव्यकार मनिराज जोशी, साहित्यकार पदमराज जोशी ‘प्रभात’ प्राज्ञ कवि वासुदेव पाण्डेय ओ कवि दीपक खनाल ओ सिद्धार्थ एकेडेमीके प्राचार्य सीबी चन्द फेन बालकवि बिभुतिके प्रशंसा करल रहिट ।
कार्यक्रममे बालकवि बिभुति धन्यबाद मन्तव्य डेटी आपनहे छन्द सिकुइया गुरू ओ घरमे आपनहे उत्प्रेरित करुइया डाइबाबाके आशीर्बादसे अपने खण्डकाव्य लिखे सेकल बटैलै । उहाँ कहलै, ‘लकडाउनके माहोल मोर लाग बरदान साबित हुइल ।’ बिभुति महिनामे उक्त बेजोड खण्डकाव्यके सृजना कैना सफल हुइल हुइट । लोकार्पण समारोहमे बिभुतिके पिता धनगढीके दून एकेडेमीके प्रिन्सिपल रामप्रसाद उपाध्याय छावाके प्रतिभा डेखके अपने ढिउर गर्वित बनल बटैलै । लोकार्पण समारोहमे साहित्यकार, कलाकार, प्राध्यापक, कवि तथा शिक्षक विद्यार्थीहुक्रनके उपस्थिति रहल रहे ।
कैलाली जनपुस्तकालयके अध्यक्ष डा. टीएन जोशीके घरगोसियाइमे हुइल कार्यक्रममे सिद्धार्थ स्कुलके प्रअ सीबी चन्द स्वागत ओ साहित्यकार टोपेन्द्र शाह कार्यक्रमके सञ्चालन करल रहिट ।
