सुरक्षित मातृत्व सम्बन्धी ऐन बनैना प्रतिवद्धता

पहुरा समाचारदाता
धनगढी, ४ चैत । कैलालीके स्थानीय सरकारसे सुरक्षित मातृत्व तथा प्रजनन अधिकार सम्बन्धी ऐन बनैना प्रतिवद्धता जनैले बटै ।

सुरक्षित मातृत्व सञ्जाल महासंघ नेपाल धनगढीमे आयोजना करल जिल्ला स्तरीय कार्यशाला गोष्ठीमे स्थानीय सरकारसे संघीय ओ प्रदेश सरकारसंग नइबाँझना करके ऐन बनैना प्रतिवद्धता जनाइल हुइट । सुरक्षित मातृत्व तथा प्रजनन् अधिकार सम्बन्धी ऐन संघसे बनाइ सेक्लेसेफे प्रदेश ओ स्थानीय सरकारसे बनाई नइसेकल हो । प्रदेश सरकारसे यी ऐन बनाइसेकलपाछे ओम्ने टेकके ऐन नइबाझन करके स्थानीय सरकारसे बनैना बताइल बा ।

कार्यक्रममे वडका पहुना रहल सुदूरपश्चिम प्रदेश सभाके उपसभामुख निर्मला बडाल जोशी प्रदेशसेफे सुरक्षित मातृत्व तथा प्रजनन अधिकार सम्बन्धी ऐन बनैना तयारी करटी रहल बटैली । उहाँ सुरक्षित मातृत्व तथा प्रजनन स्वास्थ्य अधिकार सम्बन्धी अलग ऐन अभिनसम नइबन्लेसेफे प्रदेश सुदूरपश्चिम प्रदेश जनस्वास्थ्य ऐन भर २०७६ मै बनासेकल उल्लेख करली ।

प्रथा, परम्पराके कारण यहाँ महिलासे महिलाहे हेप्न चलन ठोरिक ढेर रहल उल्लेख करटी उहाँ कानून कार्यान्वयनमे महिला अपनसे सुरु कैना आवश्यक रहल औंल्यइली । ‘पुरुषहे से ढेर समस्या महिलाहे हुइना करठ, उहाँ कहली । ‘टबमारे कानून कार्यान्वयनमे महिला आघे बढ्न आवश्यक बा ।’

कार्यक्रममे सहभागी स्थानीय तहके प्रमुख तथा उपप्रमुख ओ उपाध्यक्षहुक्रे संघीय ओ प्रदेश ऐनसंग नइबाझना करके स्थानीय सरकारहुक्रे सुरक्षित मातृत्व तथा प्रजनन् अधिकार सम्बन्धी ऐन बनैना बटैले बटै ।

घोडाघोडी नगरपालिकाके प्रमुख ममताप्रसाद चौधरी सुरक्षित मातृत्व ओ प्रजनन अधिकार स्थानीय सरकारके प्राथमिकताके विषय रहल बटैलै । उहाँ अपन पालिकासे यी सम्बन्धी ऐन हाली बनैना उल्लेख करलै । ‘सडक, पुल पुलेसो, डगरघाट बनैना केल विकास नइहो, उहाँ कहलै । ‘हम्रे, सुखी, खुशी बाटी कना मेरिक सामाजिक विकासफे विकास हो ।’

पालिकामे चुनौतीके रुपमे रहल बालविवाह रोक्न लाग स्थानीय सरकार अग्रसर रहल चौधरी बटैलै ।

ओस्टेक करके, टीकापुर नगरपालिकाके प्रमुख तपेन्द्र रावल अपन पालिकासे हालसम ऐन बनाई नइसेक्लेसेफे सुरक्षित मातृत्व ओ प्रजनन अधिकारके लाग टमान कार्यक्रम सञ्चालन करटी रहल बटैलै । गर्भवती महिलाहे अस्पतालसम जाइक लाग निःशुल्क एम्बुलेन्स सेवा, निःशुल्क रुपमे दुई पिन्ट रगत उपलब्ध करैना करल रावल उल्लेख करलै ।

‘हम्रे हाम्री छोरी, प्यारी छोरी’ कार्यक्रम सञ्चालन करके २० वर्षसे पहिले भोज नइकरुइयाहे एक हजारके दरसे सहयोगफे करटी बटी, उहाँ कहलै । ‘टबमारे, आमासंग उपमेयर कार्यक्रममार्फत नियमित रुपमे गर्भजाँच कराके स्वास्थ्य संस्थामे बच्चा जन्मैना सुत्केरीहेफे एक हजार रुप्या बराबरके पोषिलो खाना डेना करल बटी ।’

कार्यक्रममे गौरीगंगा नगरपालिकाके उपप्रमुख अञ्चला चौधरी २०७५ सालसे महिलासंग उपप्रमुख कार्यक्रम सञ्चालन करके सुत्केरीहे एक किलो घ्यु ओ पोषण खाना डेना करल बटैली । उहाँ शून्य होम डेलिभरी ओ पोषणमे सुधार कैना उद्देश्यसे यी कार्यक्रम लागू करल उल्लेख करली ।

कैलारी गाउँपालिकाके उपाध्यक्ष लक्ष्मी सत्गौंवासे अपन पालिकासे स्वास्थ्य क्षेत्रहे विशेष जोड डेके विविध कार्य करटी रहल बटैली । कार्यक्रममे गोदावरी नगरपालिकाके प्रमुख हरिसिंह साउँद, जानकी गाउँपालिकाके उपाध्यक्ष उमा महतो, बर्दगोरिया गाउँपालिकाके उपाध्यक्ष भगवती चौधरी ओ जोशीपुर गाउँपालिकाके उपाध्यक्ष गीता कठरिया, सामाजिक विकास मन्त्रालयके हेमराज खड्का, महासंघके महासचिव रविन्द्र प्रधान, उपमहासचिव कसिस महरा, कार्यक्रम व्यवस्थापक लक्ष्मी खनाल लगायत बोलल रहिट ।

कार्यक्रममे सामाजिक विकास मन्त्रालयके कानून अधिकृत दानबहादुर सुनार स्थानीय स्तरमे सुरक्षित मातृत्व तथा प्रजनन स्वास्थ्य अधिकार सम्बन्धी ऐनके अवस्था विषयक कार्यपत्र प्रस्तुत करले रहिट ।

स्थानीय तहमे सुरक्षित मातृत्व तथा प्रजनन स्वास्थ्य अधिकार ऐन निर्माण तथा प्रभावकारी कार्यान्वयन करना सहजता पुगे कहिके उ गोष्ठीके आयोजना करल संजालके प्रदेश संयोजक राजेन्द्र रैका जानकारी करैलैं ।

सुरक्षित मातृत्व सञ्जाल महासंघ नेपाल कैलालीके अध्यक्ष तपेन्द्र भुषालके अध्यक्षतामे हुइल कार्यक्रममे सहजीकरण महासंघके प्रदेश संयोजक विनय लामा ओ संचालन सदस्य भेष बम करले रहिट ।