पँचुवा थारु राष्ट्रिय साहित्य सम्मेलन सुर्खेतमे

सागर कुस्मी
ध्नगढी, ५ चैत । पँचुवा थारु राष्ट्रिय साहित्य सम्मेलन २०७७ सुर्खेतमे हुइ जैटी बा ।

थारू भाषा, साहित्य, कला संस्कृति संरक्षण कैना उद्देश्यसे इहे चैत २१ ओ २२ गते थारु राष्ट्रिय साहित्य सम्मेलन आयोजना कैगैल हो । थारू लेखक संघके आयोजना, ओ थारु पत्रकार संघ नेपाल, जंग्रार साहित्यक बखेरी, थारु कल्याणकारिणी सभा सुर्खेतके सहआयोजनामे सम्मेलन हुइ जैटी बा ।

सम्मेलनके मूल आयोजकके संयोजक संघके केन्द्रीय संयोजक कृष्णराज सर्वहारी अनुसार पहिले थारू साहित्यिक मेला २०७३ मे दाङके घोराही हुइल ओकर बाद लगतार साहित्यिक मेला हुइटी आइल मने पोरसाल कोरोनाके कारण हुइ नैसेकल उहाँ बटेलैं । सम्मेलनमे समकालीन साहित्य, कला, संस्कृति बारम्े बहस, लेखक, स्रष्टा ओइनसे गहिरके कचेहरी फेन हुउइया बा ।

ओस्टेके सम्मेलनमे असौं प्रकाशन हुइल दर्जनसे जेडा पोस्टा विमोचन ओ थारु भाषाके मेरमेरिक किताब प्रदर्शनी, बिक्रीवितरण फेन हुइना साहित्यकार सोम डेमनडौरा बटैलैं । सम्मेलनमे देशभरिक करिब दुई सय स्रष्टनके सहभागि हुइना आयोजक जनैले बा । बाहेर देशसे फेन साहित्यकार सहभागि हुइना ओ तयारी मनके हुइटी बा कहिके सुर्खेतके साहित्यकार मानबहादुर पन्ना बटैलैं ।