पत्रकार योगीके शब्दमे भीम बिसीके ‘ऐना हेरी हेरी…’ बजारमे (भिडियाेसहित)

पहुरा समाचारदाा
धनगढी, ५ चैत । संगीतकार तथा गायक भीम बिसीके लावा गीत ‘ऐना हेरी हेरी…’ सार्वजनिक हुइल बा । लेखक तथा पत्रकार शिवराज योगीसे रचल शब्दमे बिसी संगीत भरले बाटै । गीतमे आवाज पाछेक समयके चर्चित गायिका एलिना चौहान ओ बिसीके आवाज सुने सेकजाइ ।

उच्च क्वालिटीमे तयार पारल गीतके म्युजिक भिडियोके निर्देशन ओ सम्पादन भर अब्बेक चर्चित निर्देशन प्रविन भट्ट करले बाटै । गीतके एरेन्ज विश्व अधिकारी करले बाटै कलेसे अजय रेग्मी छायाङ्कन करल भिडियोमे गायिका एलिना ओ बिसी अपनहे अभिनय करले बाटै । गीतके भिडियोमे सरोज बुढाथोकीके श्रृंगार ओ कुशुम श्रेष्ठके पहिरन रहल बा ।

सहायक निर्देशक सागरबाबु भट्ट रहल गीत गायक बीसी अपने अफिसियल युटुब च्यानल भीम बिसी अफिसियलसे सार्वजनिक करले बाटै । छुटके डुर बैठ्ना बाध्य पे्रमिल जोडीके मार्मिक कथाहे गीत उतारे खोजल बा । माया, प्रेम ओ प्रमिल मनैनके साथ नैरलेसे धनसे किल मनै खुशी ओ शुखी नैरहठै कना भाव गीतमे समेटल बा ।

गीत कारुणिक किल नै रहिके आधुनिक प्रविधि ओ लयमे निर्माण करल ओरसे ढिउरजे रुचैना विश्वास भीम बिसी व्यक्त करले बाटै । बिसी सांगीतिक क्षेत्रमे पाछेक समय चर्चित बन्टी गैल सर्जकके रुपमे चिन्हजैठै । इहीसे आघे बिसीके ‘एक कान दुई कान मैदान’, ‘झम्क्या बुलाकी’, ‘टालाटुली बाटुली’, ‘निरमाया’ जैसिन दर्जनाँै गीत लाखौं स्रोता–दर्शक रुचैले बाटै । ओहकान कतिपय गीत करोड क्लबमे फेन परल बावै ।