हात्तीपाईले रोग निवारण सम्बन्धी गोष्ठी
पहुरा समाचारदाता
धनगढी, ८ चैत । धनगढी उपमहानगरपालिका स्वास्थ्य शाखाके आयोजनामे अँटवारके रोज हात्तीपाईले रोग निवारण अभियान २०७७ नगरस्तरीय योजना तथा बहुनिकाय गोष्ठी सम्पन्न करले बा ।
चैत २० गतेसे सुरु हुई लागल हात्तीपाईले रोग अन्तरगत नवौं चरणके निवारण अभियानहे कैसिक सफल बनैना कनामे गोष्ठीमे छलफल हुइल रहे ।
गोष्ठीमे धनगढी उपमहानगरपालिकाके उपप्रमुख सुशीला मिश्र भट्ट हात्तीपाईले रोग विरुद्धके औषधी खवैना अभियान सफल बनाइक लाग सरोकारवालाहुक्रे संग छलफल करल बटैली । अभियानके बारेमे व्यापक प्रचारप्रसार करके सक्कु अभियानके बारेमे जानकारी पैना वातावरण बनाई परठ उप–प्रमुख भट्ट कहली, ‘राष्ट्रिय अभियान हुइल ओरसे सक्कु सहयोग करे परठ ।’
‘हात्तीपाईले रोग विरुद्धके अभियानमे ढेर व्यक्तिहुक्रे औषधी खैनासे छुटल कना बाट बाहेर अइटी रहल बा उपप्रमुख भट्ट कहली, ‘यी बार कुहीफे औषधी खैनासे छुटे नइपरल ।’ धनगढी उपमहानगरपालिका वडा नं १२ के वडा अध्यक्ष गणेशप्रसाद जोशी वडातहमे यी अभियानके बिषयमे व्यापक प्रचारप्रसार करेक लाग महिला स्वास्थ्य स्वयंसेविका परिचालन कैना बटैलै । उहाँ कहलै, ‘ सक्कु जे जिम्मेवार हुके लग्लेसे अभियान सफल हुई ।
धनगढी उपमहानगरपालिकाके निमित्त प्रमुख प्रशासकीय अधिकृत नरेन्द्रबहादुर खाती जानलबुझल व्यक्ति हात्तीपाईलेके औषधी नइखैना करल कारण यिहीसे गलत सन्देश प्रवाह हुइना करल बटैलै । कार्यक्रममे धनगढी उपमहानगरपालिका स्वास्थ्य शाखाके अधिकृत योगेश अवस्थी ओ लक्ष्मीराज उपाध्याय सहजीकरण करले रहिट ।
