कानुनमे नैरहल छुवाछुट व्यवहारमे काजे ?
कैलाली जिल्लाके कैलारी गाउँपालिकाहे बैशाख महिनाभिट्टर छुवाछुट मुक्त गाउँपालिका बनैना घोषणा कैगिल बा । ५६ औ अन्तर्राष्ट्रिय जातीय विभेद उन्मुलन दिवसके अवसरमे आयोजित अन्तरक्रिया कार्यक्रममे ओसिन घोषणा करगिलक हो । कार्यक्रममे गाउँपालिका अध्यक्ष लाजुराम चौधरी घोषणा कैटि कहलै, ‘यी संसारमे सक्कु मानव अक्के हुइट, मने भेदभाव काहे ? हम्रे गाउँपालिकाहे बैशाख महिना भिटरे छुवाछुट मुक्त घोषणा करब ।’
सरकार कानुन टे बहुट बनाइठ, मनो व्यवहारमे लागु हुइल नै डेख्जाइठ । सरकारके करल निर्नय बिल्टाके हेर्ना हो कलेसे २०६३ साल जेठ २१ गटे नेपालहे जातीय छुवाछुट मुक्त राष्ट्र घोषणा कैगिल बा । ओहे डिनके सम्झनामे परटेक बरस जेठ २१ गटे जातीय भेदभाव ओ छुवाछुट उन्मुलन दिवसके रुपमे मनाजाइठ । १४ बरस पहिले करल यदि इ निर्नय व्यवहारमे लागु हुइने रहे टे आज कैलारी गाउँपालिकाहे अइना बैसाख महिना भिट्टर छुवाछुट मुक्त घोषणा करब कना डोसर निर्नय करे पर्ना नैरहे ।
कौनो फेन अभियानहे घोषणा किल करडेलेसे उ मुर्तरुप लेहे नैसेकठ कना उडाहरन छुवाछुट मुक्त घोषणा अभियानहे लेहे सेक्जाइठ । व्यक्ति, समाजके मानसिकता परिवर्तन नाइ हुइटसम यहाँ छुवाछुट कायमे रहना डेखाइठ । ओइसिन टे २०२० सालमे जो तत्कालिन राजा महेन्द्र मुलुकी ऐनमे जो छुवाछुटहे निषेध करल ऐन लन्ले रहिट । मने इ कानुनके कार्यान्वयन नैहुइल । नेपालके संबिधान २०७२ को धारा २४ मे छुवाछुट ओ भेदभाव बिरुद्धके हकहे मौलिक हकमे ढइ गैलबा ।
मौलिक हकमे उल्लेख कैगइल अन्सार कौनो फेन ब्यक्तिहे ओकर उत्पत्ति, जातजाति, समुदाय, पेशा व्यवसाय वा शारिरिक अवस्थाके आधारमे कौनो फेन निजि ओ सार्वजनिक स्थानमे कौनो मेरिक छुवाछुट वा भेदभाव नैकैजैना उल्लेख बा । असिन भेदभावपुर्ण व्यवहार, बहिष्कार वा निषेध कइलेसे ३ महिनासे ३ बरसससम कैद वा एक हजारसे २५ हजारसम जरिवाना वा डुनु सजाय हुइ सेक्ना उल्लेख छ बा । मने जे पिडक बा, उहि सामान्य नसिहत डेके छोरल कारन फेन छुवाछुट कम नैहुइठो ।
उहसे गाउँपालिकापिच्छे छुवाछुट मुक्त अभियान घोषणा कर्नासे फेन रहल कानुन कार्यान्वयन करे सेक्लेसे मजा रहि । आअपन गाउँसमाजहे इ महिना भिट्टर, उ महिना भिट्टर छुवाछुट मुक्त करब कनासे फेन इ छुवाछुटके बाट आजुसे हटाइ । टब किल बल्ले सुन्डर समाज बने सेकि ।
