बह्रटि रहल कोरोना ओ हमार सतर्कता
छिमेकि देश भारतमे कोरोना भाइरसके संक्रमण फेन डोस्रे फैलके सिमा नाका रहल डगर छिरके नेपालमे फेन असर परे सेक्ना जोखिम बा । इहे अवस्थाहे मध्यनजर कैकै स्थानीय प्रशासन कैलाली ओ कञ्चनपुरमे टमान प्रतिबन्धात्मक व्यवस्था लागू कैगैल बा । औरे जिल्लामे फेन इ मेरिक व्यवस्था कैना टयारि हुइटि बा ।
प्रतिबन्धात्मक ब्यवस्था अन्सार भेला हुइना, जात्रा, टरटिउहार, भिडभाड, महोत्सव, जुलुस, मेला लगाइ नैपैना हो । गइल बरस चैत ११ से कोरोनाके कारन लागल लकडाउन खुल्के नेपालिनके जनजिवन ढिरे ढिरे सामान्य हुइटि रहे । मने इ बरसके चैत ११ मे फेन डोस्रे लकडाउन सम्झैना मेरिक अवस्था आइ लागल बा ।
पछिल्का अठवारमे गौरीफन्टा नाका हुके कैलाली छिरल एक डर्जनमे कोरोना संक्रमण पुस्टि हुइल बा । स्थानीय अधिकारीके अन्सार ‘तोकल नाकासे नेपाल प्रवेश करुइया सक्कु नेपाली नागरिक ओ पूर्व स्वीकृति प्राप्त भारतीय नागरिकके अभिलेख ढैना ओ नाकामे रहल हेल्थ डेस्कसे अनिवार्य रुपमे स्वास्थ्य परीक्षण करे पर्ना बा ।’
इहिसे पहिले नाकासे विना परिक्षणके यात्रु जथाभावी छिरल कारन नेपालमे कोरोना बह्रल कना रहे । अप्कि प्रशासनसे समयमे सतर्कता अपनैना मजा बाट हो । मने जनता स्वयम् फे सजग रहक चाहि । जस्टे कि ढुरहेरि (होरि) टिउहार लग्गे आइल बा । गाउँ गाउँ समुह समुह बनाके ढुरहेरि खेले जैनासे फेन परिवारके बिचेम किल राहरंगि करे पर्ना अवस्था डेखाइटा ।
डोसर सतर्कता अप्नैना कलक मास्क लगैना हो । अभिन फेन मनै मास्क लगैना सवालहे ओटरा गम्भिरतापुर्वक नै लेले हुइट । बिहानके मोर्निङ वाकमे मास्क लगैहि पर्ना जरुरी नैहो, मने कुछ भिडभाड ठाउँमे, कुछ बेरसम रहे पर्ना बा कलेसे मास्क अनिवार्य लगाइक चाहि । इ अपने सुरक्षाके लग हो । मास्कके बेल्साइसे फेन कोरोनाके फैलावटहे बहुट कम कराइ सेक्जाइठ ।
कुछ मनै कोरोनाके पहिला खोप लगा सेक्ले बाटै । मने डोसर खोप नैलगाइटसम इ पुरा हुइल नैमानजाइठ । मने सरकार डोसर चरनके खोप लाने नैसेक्ठो । सरकार अपन सत्ता टिकैना ढ्याउन्नमे किल लागल बा । ओहेसे कोरोना लगायट महामारीसे बँचेक लग जनता अपने स्वयम् सतर्क रना टे पलि बा । अपन जनतनके सुरक्षाके लग सरकार फे गम्भिर होए ।
