२० गतेसे हात्तीपाइलेके औषधि खवैना

पहुरा समाचारदाता
धनगढी, १३ चैत । कैलाली जिल्लाभर चैत २० गतेसे हात्तीपाइले विरुद्धके आम औषधि सेवन अभियान सुरु हुइना बा ।

जिल्लाके १३ स्थानीय तहमे चैत्र २० गतेसे ३० गतेसम हात्तीपाइले विरुद्धके ९ औँ चरणके आम औषधि खुवाइना अभियान सुरु हुइना हुइल हो । जिल्लामे ८ लाख ४१ हजार २ सय एक जनहनहे हात्तीपाइले औषधि खवाइना लक्ष्य रहल स्वास्थ्य कार्यालय कैलाली जनैले बा । सुदूरपश्चिम प्रदेशके ८ जिल्लामे हात्तीपाइले रोग निवारण हुइलेसे फेन कैलालीमे भर अब्बेसम निवारण हुइ नैसेकल स्वास्थ्य कार्यालय कैलालीके प्रमुख लालबहादुर धामी जानकारी डेलै ।

उहाँ इ बेर कैलालीमे नवौँ चरणके अभियान सञ्चालन करल ओरसे सक्कु जनहनहे औषधी सेवन कैके सहयोग कैडेना अनुरोध करले बाटै । खाली पेटमे सेवन करलमे किहुहे वाक वाकी लाग्न, उल्टी हुइना, घुर्मी लग्ना हुइ सेकठ् । खाना खाके वा नास्ता खाके औषधीके सेवन कैना जनाइल बा ।

दुई बरस नैपुगल बालबालिका, गर्भवती, सात दिनुमके सुत्केरी ओ सिकिस्त बिरामी औषधि सेवन नैकैना स्वास्थ्य निर्देशनालयके जनस्वास्थ्य निरीक्षक हेमराज जोशी बटैलै । जिल्लामे हात्तीपाइले रोगहे निवारण कैना राजनीतिक दल, व्यापारी, कर्मचारी, विद्यार्थी ओ सञ्चारकर्मी सक्कु जाने आआपन पायक पर्ना स्थानमे जाके औषधी सेवन कैके सहयोग कैना उहाँ आग्रह करलै ।