कहाँ हेराइल अँगिया ?
माघक डिन ठेसे हमार थारु समुडायम एकठो कहनौटी बा कि आज ठेसे घामक ग्वारा जाम गिलिस कैक । माघ टिह्वार मनैन् घाम हँ फे हम्र आपन अँग्नम परगा डबैठि ।
थारु समुडायके बयान कर्ना हो कलसे कहाँसे सुरु करि कना हो जाईट । हरेक मेरमेरिक टिह्वार, गिट, रहनसहन, संस्कृटि, भासा वस्टहँक कैक भेसभुसा फेन उह मेरिक बा । थारु समुडाय हरेक चिज लेक भरिभराउ बा । बाट अट्र अइठा कि हम्र कहाँसम्म हेर सेक्ठी कना ।
थारु समुडाय नेपालके लग्भक बाइस ठो जिल्लाम फैलल् सत्र लाख सर्टिस हजार चार सय सट्टर ठो मनै रहल समुडाय कैक नेपालके जनगरना २०६८ के डाटाले डेखाइट ।
थारुनके मेरमेरिक प्रहर प्रहरम गैना गिट रहल जस्ट जन्यावनके लगैना लुग्गम फे घाम ओ जार मैन्हम लगैना कैक एकठो लुग्गा अल्गा जाए, उ लुग्रा हो अँगिया । पछिँउहा थारुम यह मेरिक लुग्रा लगैना चलन रह पैल्ह ।
अँगिया सब्ड कट्रा जहन ट लौव जस्ट फेन लागि । हुइना ट आसकाल गिटम फे कबुकाल सुन मिल्ठा इ सब्ड । खासम अँगिया थारु महिलन बेल्सना चोल्या हो टर इ लुग्गाहँ चोल्या कैक उच्चारण कर्बि कलसे अँगियक महत्व कम हो जैहिस । अँगिया हँ अँगिया कैके जो उच्चारन कर्बि कलस महिमा आउर झल्कहिस ।
चोल्या ओ अँगियम फरक बा, टब ट माघ म जार हँ बिडा कैक घाम हँ अँग्नम परगा टकाइल । जस्ट इ चोल्या ओ अँगिया के फेन सम्बन्ढ बाटन, इ घाम ओ जारसंग् । अँग्नम घाम हँ स्वागट करल जस्ट, यह अँग्नमसे अँगियाके बिडाबारि कैक चोल्याहँ स्वागट फे कर्ठि हम्र थारु समुडायके मनै ।
अँगियाके बाट कर्ना हो कलसे थारु समुडायके थारु महिलनम इ पोसाक महत्वपुर्ण जो बा । बिसेस कैक जार मैन्हम लहंगक संग लगा जैना उप्रि लुग्रा कलक अँगिया हो ।
अँगियक जार मैन्हम लगा जाइट । चोल्यम पाछक भाग सक्कु खुलल् रठा ट वस्टहँक कैक अँगियम पाछक भाग सक्कु नुकल रठा । जार मैन्हम घल्ना अनुसारके जो इ अँगियक बनावट टयार कैगिल रहट ।
जार मैन्हा जुरार रलक उहोरसे अँगियाहँ जो आँगक अंगरक्षक कैक यहि बेल्सट पैल थारु महिल हुँक्र । आबक बाट कर्ना हो कलसे अँगियक प्रयोग हेरा गिल बा कलसे फे फरक नै परि । आढुनिक समय हँ उँक्वार भ्याँट जसिक थारु समुदाय फे कर्ल बाट, वस्टहँक कैक आपनसंग रहल ढ्यार जसिन चिजहँ आढुनिक समयसंग बह्रैटि लैजिटि बाट ।
म्वार सम्झनाम हेर्ना हो कलसे अँगियक टर हमार बुडी रंगिन चोल्या, गोन्या ओ लहँगा घल्लक बाट बटाइट । आढुनिक समयसंग कसिक अँगिया लगायट अन्य थारु पोसाक ओल्टारम आ गिल कना बाट हम्र ढेर जन महसुस जो नै कर्ल हुइ ।
समय सापेक्ष रुपम जसिक चोल्यक माँगन बह्रल, वस्टहँक अँगियक माँगन घट्टी गिल । आब हेर्बो कलसे थारु लुग्रा लहंगा ओ चोल्यक माँगन ढ्यार डेखा परट ।
चोलिया सिलाइ डेउ डाडु
म्वार जैना बा डुरु डेस
इ गिट फे अँगियासे चोल्या जो महत्वपुर्ण बा कना डेखाइल । असिक फे इ अँगियक माँगन कम हुइटि गैलस । और लुग्राके जस्ट अँगियाके संरक्षण फेनसे काखर कर नै सेक्बि ट हम्र ?
(लेखिका नेपाल आदिवासी जनजाति साहित्यकार महासंघके केन्द्रिय अर्थ संयोजक बटि ।)
