कोरोना संक्रमित फेन सार्वजनिक सवारी चहुँरके घर जैटी

पहुरा समाचारदाता
धनगढी, १४ चैत । भारतमे कोभिड–१९ संक्रमित बह्रटी बेला नेपाल अउइयानके नाकामे एन्टिजेन परीक्षण करे लागल बा । मने, ओइसीन परीक्षणमे कोरोना पोजेटिभ डेखलहुक्रे सार्वजनिक सवारी साधन चहुँरके गन्तव्यमे जैटी रहल बाटै । इहीसे संक्रमणके जोखिम बह्रैले बा ।

एन्टिजेन परीक्षणमे पोजेटिभ डेखलहे आइसोलेसनमे राख्न वा सुरक्षित रूपमे होम आइसोलेसनसम पुगैना सम्बन्धित निकाय चासो नैडेहल हो । धनगढीसे जोरल कञ्चनपुरके त्रिनगर नाकामे अँठ्वार यहोर भारतसे अउइया १९ जनहनमे एन्टिजेन पोजेटिभ डेखल बा । आर्थिक अभावसे छुट्टे गाडी रिजर्भ करे नैसेकलपाछे सार्वजनिक यातायातमे घर जाइ परल पोजेटिभ डेखलहुक्रे बटैले बाटै ।

भारतके सुरतसे आके कञ्चनपुरके वेदकोट नगरपालिकाके एकजाने नाकामे जाँच करेबर एन्टिजेन पोजेटिभ डेखगैलेसे फेन अपने बस चहुँरके घर आइल बटैलै । त्रिनगर नाकासे धनगढीसम रिक्सामे पुगल बटैटी उहाँ कहलै, ‘कोरोना पोजेटिभ डेखगैलेसे फेन गाडी रिजर्भ कैके जैना पैसा नैरहे । ओहेमारे सार्वजनिक बसमे अइनु । बसमे यात्रा करेबर मास्क ओ स्यानिटाइजर भर प्रयोग करले रहुँ’ अब्बे उहाँ होम आइसोलेसनमे बाटै ।

नाकाके हेल्थ डेस्क पोजेटिभ रिपोर्टके पर्चा डेके ओहेबेला घर पठैना करल बा । हेल्थ डेस्कमे स्वास्थ्यकर्मी खटैना निकाय पोजेटिभ डेखलहे का कैना कहिके स्वास्थ्यकर्मीहे कुछ नैकले हो । ‘पोजेटिभ डेखलहे सुरक्षित हिसाबसे जैना, घरमे छुट्टे बैठ्ना कहिके सल्लाह डेना करल बाटी,’ हेल्थ डेस्कमे खटल एक स्वास्थ्यकर्मी कहलै, ‘गाडी रिजर्भ कैके जैना सक्कु जनहनठन पैसा नैहो । उहाँहुक्रे जैना सार्वजनिक यातायातमे होरु। इहीसे संक्रमणके जोखिम भर बह्रैले बा ।’

हेल्थ डेस्कमे खटल अहेव गणेशबहादुर साउँद पोजेटिभ डेहलहे सुरक्षित तरिकासे पठैना वा होल्डिङ कैके रख्ना बारे सम्बन्धित निकाय आपनहे कुछ नै कहल बटैलै । जाँच्न ओ रिपोर्ट डेना किल कले बा ।