संगीत मार्फत बाल अधिकारके माग
पहुरा समाचारदाता
धनगढी, १५ चैत । नेपालमे बाल अधिकार हनन् हुइल घटना दिनहु बाहर अइटी रहठ् ।
बालबालिकाहे ओइनके अधिकारसे वञ्चित कराके कडा परिश्रम करे लगाके श्रमशोषणके घटना फेन दिनहुँ जैसिन मिडिया मार्फत बाहर अइना करठ् । यकर साथे कौनो कौनो बालबालिकाके अभिभावक फेन आपन बालबालिकाहे खेल्ना कुद्ना उमेरमे श्रमशोषण करल घटना फेन हम्रे सुन्टी डेख्टी आइल बाटै ।
इहीसे लाखौं बालबालिका आभिन आपन अधिकारसे वञ्चित हुइल बाटै । आभिन फेन उहाँहुक्रे उचित स्वास्थ्य सेवा, पोषण, शिक्षा ओ हिंसासे सुरक्षा पाइ सेकल नैहुइट ।
इहे सन्दर्भमे थारू पहिल बाल अधिकार गीत ‘हमार बाल अधिकार’मे बनल भिडियो सार्वजनिक हुइल बा । इ भिडियो मार्फत बालबालिकाहुक्रे आपन अधिकारके माग करले बाटै । उहाँहुक्रे आपन अभिभावकहुक्रनहे औरेक घरमे सक्करही गोबर काह्रे ओ छेगरीभेँरी नै चह्राइ पठैना कहटी संगीत मार्फत आग्रह करले बाटै ।
यकर साथे उहाँहुक्रे बाल उमेरमे पह्रना, खेल्ना कुद्ना, नाच्न गैना समय रहल ओरसे आपन अभिभावकहे आपनहे विद्यालय पठैना आग्रह करले बाटै । साथे उहाँहुक्रे अतिरिक्त क्रियाकलापसे बालबालिकाके बौद्धिक विकास हुइना हुइल ओरसे अतिरिक्त क्रियाकलाप जस्टे खेलकूद, सांस्कृतिक कार्यक्रम ओ टरटिहुवारमे रमैटी नाचे पाइ पर्ना फेन माग करले बाटै ।
गीतमे इन्दु थारूके शब्द संगीत रहल बा । भिडियोमे इन्दु थारूके डाइरेक्सन ओ कन्सेप्ट रहल बा । गीतमे बाल गायक मनिष थारू ओ मिस्मीता चौधरीके रहल बा ।
भिडियोमे बाल कलाकार मनिष थारू, सर्विना, सानु हर्दिउला, ब्रेभिया करिया प्रधान, ऋष्टिना करियाप्रधान, उषा चौधरी, जस्मीन चौधरी ओ बिवेक चौधरीके भूमिका रहल बा ।
भिडियोके प्रोड्यूसरमे टीका चौधरी, गीता चौधरी, ठाकुर करिया प्रधान ओ बाँधु हर्दिउला रहल बाटै । क्यामेरामे बिहारी दहित, मेकअपमे सानु कुश्मीके रहल बा ।
भिडियो ढुरहेरीके अवसरमे थारू ड्रागनफ्लाई यूट्यूब च्यानलसे सार्वजनिक हुइल बा ।
इहीसे आघे थारू भाषाके पहिल पौराणिक बालगीत ‘उक्रु· बुक्रु·’ भिडियो आसेकल बा । भिडियोमे बालकलाकार मनिष थारू, श्रविना चौधरी, ऋष्टिना चौधरी, सानु हरदिउला, ब्रेभिया चौधरी, लगायतके अभिनय रहल बा । इ गीतके फेन शब्द संकलन इन्दु थारूके रहल बा । कलेसे गीतमे संगीत संयोजन सि.एल चौधरीके रहल बा ।
गीतमा बाल कलाकार मनिष थारू ओ अमृता चौधरीके स्वर रहल बा । थारु बालबालिकाहुक्रनसे अत्यधिक रुचाइल बालगीत ‘उक्रु· बुक्रु·’ भिडियो हमार म्युजिक बगियाके अफिसियल युट्यूब च्यानल मार्फत सार्वजनिक हुइल बा ।
