पहलमानपुरमे कोल्ड स्टोर सञ्चालन

पहुरा समाचारदाता
धनगढी, २० चैत । कैलालीके पहलमानपुरमे स्थापना करल तीन हजार मेट्रिकटन भण्डारण क्षमता रहल शित भण्डार गृह (कोल्ड स्टोर) सञ्चालनमे आइल बा ।

फागुन अन्तिम अँठ्वारसे सञ्चालनमे आइल सुदूरपश्चिमके सबसे बरवार इ कोल्ड स्टोरमे किसान आलु, प्याज, टमाटर, बन्दा, काउली, हरियो खुर्सानी, अदुवा लगायत उपज राखे सेक्ना सुविधा रहल बा ।

सुदूरपश्चिम मोहन्याल कृषि तथा पशुपालन व्यवसाय प्रालि करिब १८ करोड रुपैयाँके लागतमे कोल्ड स्टोर स्थापना करल हो । कोल्ड स्टोर स्थापनाके लाग नेपाल सरकारके साना तथा मझौला कृषक आयस्तर वृद्धि आयोजना, कृषि ज्ञान केन्द्र कैलाली ओ स्थानीय घोडाघोडी नगरपालिकाके समेत कैके दुई करोड २९ लाख रुपैयाँ अनुदान लगानी हुइल बा । तरकारी उत्पादनके लाग पकेट क्षेत्रके रुपमे रहल कैलालीमे कोल्ड स्टोर नैहोके यहाँके किसानहे सिजनमे उत्पादन करल तरकारी भण्डारण कैके राख्न समस्या हुइना करल रहे । उत्पादित तरकारी बिक्री नैहोके खेर जैना करल रलेसे फेन कतिपय किसान कञ्चनपुर, बाँके ओ दाङ लैजाके तरकारी भण्डारण कैना करल रहिट ।

कोल्ड स्टोर सञ्चालनमे आइलपाछे किसान धमाधम तरकारी राखे लागल बाटै । कुछ दिनके अवधिमे साढे तीन हजार क्वीन्टर आलु भण्डारण हुइल सुदूरपश्चिम मोहन्याल कृषि तथा पशुपालन व्यवसाय प्रालिके अध्यक्ष रामबहादुर रावतले जानकारी डेलै । छोट किसान फेन लाभान्वित हुइट कहिके कम मात्रामे फेन तरकारी भण्डारणके सुविधा डेहल उहाँ जानकारी डेलै ।

कोल्ड स्टोर सञ्चालनसे तरकारी भण्डारणमे सहज हुइना कहटी किसान खुशी हुइल बाटै । बिक्री नैहोके बारीमे तरकारी कुहना अवस्था नै रहना उहाँहुक्रनके कहाइ बा । तरकारी खेतीमे संलग्न कृषक बिश्राम चौधरी आलु ओ प्याज भण्डारण सुविधासे किल फेन आपनहे ढिउर सहज हुइना बटैलै । ढिउर मात्रामे खेती करटी रहल किसान सिजनमे तरकारी खिरबासे फेक्ना अवस्था रहल उल्लेख कैटी उहाँ कहलै, ‘कोल्डस्टोर थपना हो कलसे किसानहे ढिउर सहज हुइ ।’

कृषि ज्ञान केन्द्र कैलालीके प्रमुख खगेन्द्रराज शर्मा भण्डारण सुविधासे भारतसे हुइना तरकारीके आयात फेन घटना उहाँ बटैलै । ‘सिजनमे बिक्री नैहुइल तरकारी कुहना, खिरबासे जैना रहे । आब बजारीकरणके अभावसे तरकारी खिरबासे नै फेके परी ।’ शर्मा कहलै, ‘उचित मूल्य नैपाइल बेला किसान कोल्ड स्टोरमे भण्डारण कैके राखे सेक्ठै ।’

सिजनमे उत्पादन हुइना तरकारी भण्डारण कैके राख्न सुविधा नैहोके सुदूरपश्चिममे बर्सेनि लाखौँ रुपैयाँ मूल्यके तरकारी भारतसे आयात हुइना करल बा । ढिउर क्षमताके कोल्ड स्टोर सञ्चालनमे आइलपाछे बेसिजनमे भारतसे हुइना आयात घट्ना कृषि प्राविधिकहुक्रे बटैले बाटै ।

कृषि निर्देशनालयके अनुसार सुदूरपश्चिममे कञ्चनपुरमे दुई हजार मेट्रिकटन ओ डडेल्धुरामे करिब एक हजार दुई सय मेट्रिकटन क्षमताके दुईठो किल कोल्ड स्टोर बावै । नेपाल सरकारके सहयोगमे कैलालीमे फुलबारीमा निर्माणाधीन दुई हजार मेट्रिकटन क्षमताके कोल्ड स्टोर इहे बरसभित्रे निर्माण हुइना बाा । कुछ ठाउँमे छोट छोट कोल्ड स्टोर फेन निर्माणाधीन अवस्थामे बावै ।

निर्माणाधीन सक्कु कोल्ड स्टोर सञ्चालनमे अइलेसे भारतसे तरकारीके आयात ढिउर हदसम घट्ना ओ तरकारीमे प्रदेश आत्मनिर्भर उन्मुख हुइना कृषि ज्ञान केन्द्र प्रमुख शर्मा बटैलै । भण्डारण क्षमता नैहोके आलुके बीयामे अब्बे फेन पूर्ण रुपमे भारत निर्भर हुइ परल उहाँ बटैलै । ‘कोल्डस्टोर थपे लागल बावै । भण्डारणके सुविधा बह्रल बा,’ उहाँ कहलै, ‘आब तरकारी उत्पादनमे कृषकहे प्रोत्साहन करे परल ।’ तरकारी उत्पादन बह्राइ सेक्लेसे बेमौसमी सिजनमे आयातमे निर्भरता ओ मनपरी मूल्य वृद्धि कम हुइना शर्मा बटैलै ।