नेतृत्वमे थारु पत्रकार ओ पदीय जिम्मेवारी
नेपाल पत्रकार महासंघके २६ औं महाधिवेशनसे विपुल पोख्रेलके सभापतित्वमे लावा कार्यसमिति छानगैल बा । महासंघके सदस्य रहल सबजाने भोट डारे पैना ओ केन्द्र, प्रदेश, जिल्ला तहके संगे चुनाव हुइल इ पहिल फेरा हो । ओहेसे महासंघके इतिहासमे इ ऐतिहासिक महाधिवेशन हो ।
इहे क्रममे मेरमेरिक जिल्ला, प्रदेशमे थारु पत्रकार नेतृत्व तहमे आइल बाटैं । सुदूरपश्चिम प्रदेशमे प्रदेश ओ जिल्ला तह कैके ११ जाने थारू पत्रकार नेतृत्व तहमे पुगल बाटै । इ फोहिक बाट हो । नेतृत्व तहमे आइल औरे प्रदेश, जिल्लाके थारु पत्रकारन्के तथ्य फे ढिरे ढिरे अइबे करि । काजेकि जिटल सक्कु पत्रकारन् सम्मान कर्ना उद्घोस थारु पत्रकार संघ नेपाल कइ सेकल बा ।
यहोंर केन्द्रमे थारु पत्रकारन्के उपस्थिति जिरो बा । नेपाल पत्रकार महासंघके केन्द्रीय सदस्यमे कान्तिपुर एफएममे कार्यरट पार्वता चौधरी उठल रहि, मने उ थाहा खबर रेडियोमे कार्यरट सञ्चु ब्लोन तामाङसे हारल बटि । इहिसे पहिले लक्की चौधरी नेपाल पत्रकार महासंघके केन्द्रीय सदस्य हुइल बाहेक आभिन सम कोइ पत्रकार केन्द्रमे पुगे सेकल नैहो । ना टे थारु पत्रकार जिल्लाके सभापतिके बागडोर सम्हारल उडाहरन डेख्जाइठ ।
महासंघमे आदिवासी जनजाति, दलित, मधेसी लगायतहुक्रनके प्रतिनिधित्व सुनिश्चित हुइल बा । मने थारुन्के प्रतिनिधित्व सुनिश्चत नैहो । जबकि अब्बे थारु समुदायहे छुट्टे क्लस्टरके रुपमे ले गैल बा । लोकसेवा आयोग लगायटमे थारुन्के लग छुट्टे आरक्षणके व्यवस्थाके लग ऐन बनल बा । इ अलग बाट हो कि साढे ६ प्रतिशत रहल थारुन्हे ५ प्रतिशत किल कोटा डेना कहि जाइटा ।
थारुनके अलग क्लस्टरके लग संविधानमे उल्लेख हो सेकलमे नेपाल पत्रकार महासंघहे थारु पत्रकारनके हकके बेवास्ता कर्ना ठिक नाइ रहि । नेपाल पत्रकार महासंघके २६ औं महाधिवेशनसे सभापति हुइल विपुल पोख्रेल दाङके हुइट । उ कैयो फेरा घोराही नगरपालिकासे थारु भासामे जो सुचना माँगके थारु भासाप्रटि अपन उच्च सम्मान रहल उडाहरन डेखैले बाटै । ओहेसे पोख्रेल नेतृत्व थारु पत्रकारन् समावेशी ढंगले लन्ना नीति बनाए । यकर लग नेतृत्वमे आइल थारु पत्रकार अपन पदीय जिम्मेवारी पुरा करिट, केन्द्रमे दवाव डिंट ।
