अभिभावक, विद्यार्थी ओ स्कुलके सम्बन्ध
एभरेष्ट एकेडेमी अत्तरिया अपन विद्यार्थीन्के ४० जाने अभिभावकन्हे भर्खर एक डिने हस्तकलाके समान बनैना अभिमुखीकरण तालिम डेले बा । खिरासे गिल रड्डि कागजके बेल्साइसे रोजगारी सिर्जना कैके अभिभावकन्के आयआर्जन अभिबृद्धि करना उद्देश्यसे तालिम डेगैल आयोजक जनैले बा ।
एकठो कहकुट बा, खालि डिमाग सैटानके घर । गोस्याहे आफिस, लर्कापर्कनहे स्कुल पठाके बहुट गिरहिनिन् घरे ओस्टे रहठैं । कबु उ छिमेक्,ि कबु इ छिमेकिक् बाट काटके समय बिटैठैं । अइसिनमे कौनो कामेम लग्लसे समय फे कट्ना, आनक बाट कट्ना समय नैमिल्ना, उपरसे पकेट मनिहस कुछ आयआर्जन फेन हुइना एभरेष्ट एकेडेमीके नानल उपाय उडाहरनयोग्य बा ।
हस्तकलाके प्रशिक्षक सचिन भट्टके कहाइ बा कि घर, स्कुल, कार्यालय, मेरमेरिक उद्योगसे निक्रल रड्डि कागजके बेल्साइले टमान मेरिक आकर्षक ओ बहुमुल्य गरगहना, सजावटके सरसामान, सहजिले बनाइ सेक्ना अवस्ठा बा । ओ, यकर स्थानीय ओ अन्तर्राष्ट्रिय बजारमे मजा माग रहल बा । आज्कल लर्कापर्कनके बर्थ डे के अवसरमे बहुट महँगा महँगा उपहार डेना चलन अइटि बा । अइसिनमे अपने सिपसे बनाइल समान उपहार डेके रकम जोगाइ सेक्जाइठ ।
पहिल चरणके तालिमपाछे इच्छुक अभिभावकहुकनके छनौट करके व्यवसायिक तालिम डेना योजना रहल एभरेष्ट एकेडेमीके प्रधानाध्यापक स्माइल चौधरी जनैले बाटै । वास्तवमे अइसिन तालिम अभिभावक, विद्यार्थी ओ स्कुलके सम्बन्धहे आउर बल्गर बनाइठ । आपन लर्कापर्का पह्रैना कौनो फे स्कुल अभिभावकन् कौनो मेरिक तालिम डेहल नैडेख्जाइठ । स्कुलिक बार्षिकोत्सवके अवसरमे झारा टारे भरिक अभिभावकन्के भेला कैजाइठ । ओम्ने बहुट सिमिट अभिभावक आइल रहठाँ । ओहेसे अभिभावक, विद्यार्थी ओ स्कुलके सम्बन्धहे आउर मजबुट बनाइक लग एभरेष्ट एकेडेमीके नानल योजना सराहनिय बा । आउर स्कुल फेन अभिभावकन्हे व्यवसायिक तालिम डेना योजना लानिट ।
