थारू मरुवक् बेहाल ओ बरघरके दायित्व

कैलाली जिल्लाके गौरीगंगा नगरपालिका वडा नम्बर १० सुन्दरपुर टोलमे बन्टि रहल थारू डेउठान मरुवाके अवलोकनके साथे सहयोग करगैल समाचार आइल बा । थारू गुरुवा बैडवा सेवा समाज ओ भल्मन्साके पहलमे बन्टी रहल डेउठानके लग नेपाली कांग्रेसके महासमिति सदस्य लक्ष्मीराज पाठकसे लावा बरसके अवसरमे १२ हजार सहयोग करले रहिट ।

ओइसिन टे २०७५ अगहन १६ गटे शिलन्यास हुइल डेउठान अब्बे बल्ले बन्टि बा । हाल डेउठान के घर, बैठक बैठना घर, ओ ५ कोठाके पक्की घरके लग वडासे ५ लाख सहयोगमे जग बन सेकल बा । सुन्दरपुर गाउँके मरुवा सुन्दर बने, कामना बा । मने बहुटसे थारु गाउँक् मरुवा टुटल झोंप्रिएम बा । कहुँ कहुँ झोंप्रिक मरुवक् ठाउँमे पक्कि टे बनल बा, मने झोंप्रिक मरुवासे फेन साँकिर बनटा । सुन्दरपुरके नन्हे मरुवक् छेउछाउमे अन्य बैठककोठा बनैना सोंच नैआइठो । जबकि थारु समुदाय आवाज उठाइ सेक्ले डेउठान संरक्षणके लग स्थानीय निकायसे कुछ ना कुछ सहयोग मिल्ना अवस्ठा बा । हम्रे अपन व्यक्टिगट घर पक्कि बनैना जोरजुलुम कर्ठि टे डेउठानके घर पक्कि बनैना जोरजुलुम काजे नै कैना ?

बरघर, भलमन्साके अग्वाइमे माघेम भुरा खेल हुइठ । टब्बे हुइठ बार्सिक समिक्छा । मने आम प्रचलनमे रहल बैसाखे लावा बरसमे फेन काजे नैहुइना चाहि हमार गाउँघरके समिक्छा । माघ, फागुन, चैट इ ३ महिना भल्मन्सन गाउँ चला सेक्लाँ । ओहेसे लावा बरसके अवसरमे अपन गाउँघरक त्रैमासिक समिक्छा बैठना परम्परा बैठाइक चाहि । इ का करे जरुरि बा कलेसे आर्थिक बरस असार मसान्तमे ओराइठ । उहिसे पहिले गाउँ परिषद बैठठ् । ओम्ने अपन गाउँक् विकासके योजना पारक लग फेन भल्मन्सन कन्कनार रना चाहि ।

बहुट गाउँमे मरुवक् चर्चल क्षेत्रके लालपुर्जा नैहो, ओहेसे संढियार जग्गा डबैटि जाइटैं । सचेट बरघरियन अपन व्यक्टिगट जग्गाके संरक्षण करेहस सामुहिक जग्गाके संरक्षण करे पर्ना जरुरि बा । गाउँक् अग्वन सामान्य झैंगडा मिलैना कामेम् किल सिमिट नैहोके अपन गाउँहे आउर गाउँसे कसिक सुन्दर बनाइ सेक्जाइ ? इ दायित्व औरेक नाहि मोरे कन्ढम आइल बा कना विचार विमर्श करिट ।