विद्यालय बन्द कैना संसदीय समितिके निर्देशन

काठमाडौं, ३ वैशाख । संसदीय समितिसे बालबालिका कोभिड–१९ महामारीके जोखिममे परल कहटी तत्काल विद्यालय बन्द करके वैकल्पिक विधिसे पठन पाठन सञ्चालन कैना निर्देशन डेले बा ।
राष्ट्रियसभा अन्तर्गतके दिगो विकास तथा सुशासन समितिके शुकके बैठल बैठकसे विद्यार्थीमे कोरोना संक्रमणके पुष्टि हुसेक्लेसेफे विद्यालय सञ्चालकहुक्रे विद्यार्थीके भौतिक उपस्थितिमे कक्षा सञ्चालन करटी रहल ओ उहीसे बालबालिकामे संक्रमणके जोखिम बढाइल निष्कर्ष निकारल हो ।
समितिसे स्वास्थ्य तथा जनसंख्या मन्त्रालयके अपील ओ विज्ञहुकनके सुझावहे ध्यानमे धारके भौतिक उपस्थितिमे हुइना सिकाइ बन्द करके अनलाइन वा वैकल्पिक माध्यमसे पठनपाठन करैना निर्देशन डेले बा । समितिसे कोरोना संक्रमण विल्गाईबेरफे विद्यालय बन्द कैना नइमनुइयाहे कारबाही कैनाफे निर्देशन डेले बा ।
निर्देशनमे कहल बा, ‘स्वास्थ्य मन्त्रालयके विज्ञप्ति, विज्ञहुकनके सुझाव तथा शुकके छलफल अनुसार हमार बालबालिका बहुट जोखिममे विल्गाइल बटै । ओ स्कुलमे कोरोना संक्रमण हुइल पुष्टि हुसेक्लेसेफे चरम लापरवाही कैना स्कुलहे अनुगमन करके कडा कारवाही कैना ओ विद्यालयमे विद्यार्थीहुकनके भौतिक उपस्थितिमे हुइना सिकाइ तत्काल बन्द करके वैकल्पिक विधिसे (भर्चुअल) वर्तमान अवस्था अनुसार पठन पाठन कडाइके साथ करैना यी समिति नेपाल सरकारहे निर्देशन डेहठ ।’
छलफलमे सहभागी समिति सदस्यहुक्रे भौतिक उपस्थितिमे स्कुलमे हुइना पठन पाठनलगायत क्रियाकलापके कारण भारी संख्यामे बालबालिका कोभिड– १९ के उच्च जोखिममे रहल कहटी तत्काल विद्यालय बन्द कैना सरकारहे सुझाव डेहे पर्ना धारणा धरले रहिट ।
समिति सदस्य रमेशजंग रायमाझी प्याब्सन एनप्याब्सनहुकनके आर्थिक चलखेलमे शिक्षा मन्त्रालय लागल ओ निर्वाध स्कुल सञ्चालन करे डेहल आरोप लगैलै । उहाँ ललितपुरस्थित डीएभी स्कुलसे विद्यार्थीमे कोरोना संक्रमण पुष्टि हुकेफे विद्यालय सञ्चालन करके ठप जोखिम बढाइल कहटी ओसिन स्कुलके अनुगमन करके कारवाही करे पर्ना धारणा रख्लै ।
‘विज्ञहुक्रे कहटी रहल बा भौतिक रुपमे स्कुल बन्द करे परठ । मने शिक्षा मन्त्रालय नइमान्ठे । का बा शिक्षामन्त्रीके इन्ट्रेस्ट यम्ने ? शिक्षा मन्त्रालयके इन्ट्रेस्ट का बा कहेबेर प्याब्सनवालासंग पैसा लेहल कहिके जैसिक चर्चा हुइटी रहल बा । विद्यार्थीसंग पैसा असुल्न स्कुल बन्द करे नइपरठ कहिके स्कुल सञ्चालक लगल विल्गाइठ उहाँ कहलै ।
