उन्नत बिया कि रैथाने बिया ?
लावा बरस मनाके सुस्टैटि रहल किसान गोहुँ कट्नामे डँटल बाटैं । इहे क्रममे उन्नत बियाके बेल्साइले सुदूरपश्चिम प्रदेशमे धान ओ गोहुँलगायट मुख्य बालीके उत्पादकत्व पाछेक बरसमे बह्रटि गैल तथ्य सार्वजनिक हुइल बा । सिँचाइके सुविधा पहिलेकले आउर विस्तार हुइटि गैल ओ किसान कृषिसम्बन्धी प्रविधिसे जानकार हुइटी गैल ओरसे फेन उब्जनि बह्रटि गैल क्षेत्रीय कृषि विकास निर्देशनालय जनैले बा । मने अभिन फेन उ क्षेत्रके पहाडके डडेलधुरा जिल्लाबाहेक आउर जिल्लामे कम उब्जनि हुइल ओर्से उ जिल्लाहे थरुहटके कैलाली, कञ्चनपुरके उत्पादन पल्टि बा ।
खेटवा जोट्ना, कट्ना ओ डैंना जैसिन कामेम आधुनिक कृषि औजारके प्रयोग बह्रे लागलपाछे किसानन् गोहुँ ओ धानलगायट खेती कैना पहिलेकसे सहजिल हुइटी गैल बा । आधुनिक कृषि औजारके बेल्साइले समयके बचत हुइनाके साथे परिश्रमसमेत कम करे पर्ना होके पहिलेकसे ढिउर सहजिल हुइल बा । गोरुन्ले खेटवा जोट्ना चलन एक देशके खिस्सा बन्ना हस अवस्ठा आ गिल बा । खेती कैना प्रनालिमे आइल परिवर्तनले खेटवा जोटेबेर, धान लगाइबेर गैना सजना सुन्ना सिहनि हुइ लागल बा । गोरुभैंस हेरैटि कि घुरौरक चलन फे हेराइ लागल । आब रासायनिक मलखादमे किल भर पर्ना अवस्ठा हो सेकल । मने यकर जथाभावी बेल्साइले माटी बिग्रटी गैल किसानन्के अनुभव बा । उपरसे समयमे मल नैआके किसान अपनेहे प्रांगारिक मल बनैनामे लागे पर्ना अवस्ठा बा ।
किसानहुकन उन्नत बिया सजिले मिल्ना मजा बाट हो । प्रदेशमे बीउबिजन गुणस्तर नियन्त्रण केन्द्रसे अनुमति लेके उन्नत बिया उत्पादन कैना निजी कम्पनी स्थापना हुइटि रहल इ फेन सुखद खबर हो । मने कबुकाल्ह उन्नत बिया फेन धोखा डेहठ । जस्टे कि गैल बरस गरिमा धान लगुइयन धान नैफुटके रोइ पर्लिन । ओइने उचिट क्षतिपुर्ति फेन नैपैलाँ ।
राइरब्बि फेन कौनो फेन जातिन्के पहिचान बोकठ । जस्टे कि अन्डी धान थारु समुदायमे लोकप्रिय बालि हो । अटवारिम अन्डीक रोटी अनिवार्य बना जाइठ । मने उन्नत बिया आके अन्डी धान आब ढिरे ढिरे हेरैटि जाइट । ओहेसे उन्नत बिया कि रैथाने बिया कहेबेर निस्चय फेन उन्नत बिया पहिला रोजाइमे आइ । मने हमार मौलिक बिया फेन नै उप्ठाइक चाहि । काजेकि रैथाने बियामे रोग किरा फेन कम लग्ठैं ।
