ठप १ हजार १५ जाने कोरोना संक्रमित, ४ के मृत्यु

काठमाडौं, ५ वैशाख । पाछेक २४ घण्टामे नेपालमे १ हजार १५ जाने कोरोना संक्रमित ठपल बाटैं । स्वास्थ्य तथा जनसंख्या मन्त्रालयके अन्सार देशके टमान प्रयोगशालामे करल ५ हजार ८४ पीसीआर परीक्षणसे अँट्वारके रोज १ हजार १५ जाने संक्रमित फेला परल हो । ओस्टेक ६ सय ९९ एन्टिजेन परीक्षणसे ८१ जानेमे संक्रमण पुष्टि हुइल बा ।

२४ घण्टामे पीसीआर ओ एन्टिजेन विधिसे हुइल परीक्षणसे १ हजार ९६ जाने संक्रमित बनल बाटैं । हालसम नेपालमे कोरोना संक्रमितके संख्या २ लाख ८४ हजार ६ सय ७३ पुगल बा ।

२४ घण्टामे २६२ जाने डिस्चार्ज हुइल बाटैं । यी सँगे कोरोनामुक्त हुइनाके संख्या २ लाख ७५ हजार ३०० पुगल बा । ओहे अवधिमे कोरोनासे ४ जानेक मृत्यु हुइल मन्त्रालयके तथ्यांक बा । यी सँगे कोरोनासे ज्यान गुमाइलके संख्या ३ हजार ८३ पुगल बा । सक्रिय संक्रमित ६ हजार २ सय ९० बाटैं कलेसे क्वारेन्टाइनमे ८५ जाने रहल बाटैं ।