त्रिकोणात्मक ट्वान्टी–२० शृंखलामे नेपालके लगातार दोसर जित
काठमाडौं, ६ वैशाख । त्रिकोणात्मक ट्वान्टी–२० शृंखलामे नेपाल लगातार दोसर जित निकरले बा । सोम्मारके रोज हुइल खेलमे कुशल भुर्तेल ओ आसिफ शेख लगातार सानदार ब्याटिङ करलपाछे नेपाल त्रिकोणात्मक ट्वान्टी–२० शृंखला क्रिकेटमे मलेसियाहे ९ विकेटसे पराजित करल हो ।
कुशल ओ आसिफ पहिल विकेटमे १ सय २ रनके साझेदारी करलपाछे मलेसियासे छारल १ सय १० रनके मध्यम चुनौतीहे १२.१ ओभरमे पूरा करल ।
नेपालहे लगातार दोसर जित डेहेबेर कुशल अविजित ६१ ओ आसिफ ४२ रन बनैलैं । नेपाल विजयके नजिक पुगलपाछे आउट हुइल आसिफ २९ बल खेलके ४ चौका ओ १ छक्का प्रहार करलैं । कुशल ४१ बल खेलके ३ चौका ओ ५ छक्का प्रहार करलैं । दीपेन्द्र ६ रनमे अविजित रहलैं ।
यीआघे टस हटलपाछे ब्याटिङमे आइल मलेसिया १६.५ ओभरमे अलआउट हुइल रहे । करण केसी ३ विकेट लेके मलेसियाहे धरासायी बनैलैं । करण ३ ओभरमे १७ रन खर्चाकरके ३ विकेट लेनैं । सन्दीप लामिछाने ३.५ ओभरमे २५ रन खर्चाकरके २ विकेट लेनैं । सोमपाल कामी, दीपेन्द्र सिंह ऐरी, कुशल मल्ल ओ शाहब आलमके नाममे १–१ विकेट रहल ।
मलेसियासे ओपनर सैयद अजिज सर्वाधिक २७ रन बनैलैं । उहाँ २४ बल खेलके ४ चौका ओ १ छक्का प्रहार करलैं । कप्तान अहमद फेज ३ रनमे रनआउट हुइना मलेसियाके दुर्भाग्य रहल । उहाँहे विकेटकिपर विनोद भण्डारी ओ करण मिलके रनआउट करलैं ।
सर्भिन मनिआन्डी २० ओ सफिक सरिफ १५ रन बनैलैं । दोसर जितेपाछे नेपालके फाइनलमे पुग्ना सम्भावना बलगर हुइल बा । राउन्ड रोबिनमे एक औरे टोलीसँग २–२ खेल खेललपाछे शीर्ष दुई टोली फाइनल पुग्ही ।
नेपाल काल्ह (मंगरके रोज) नेदरल्यान्ड्ससँग खेली । मलेसिया दुनु खेल हटल बा । नेदरल्यान्ड्स २ खेलमे १ मे विजय ओ १ मे पराजय भोगले बा ।
