मुक्त कमलरीके मागप्रति गम्भीर बनी
डस्टाके जन्जिरसे मुक्तीपाछे मुक्त कमलरीहुक्रे अपन माग मुद्दा सम्बोधनके लाग भुखे पियासे आन्दोलन करैलै । जिल्लासे सुरुवाट करल आन्दोलन सिंहदरबारसम पुगल । मुक्तकमलरीके माग, मुद्दाप्रति सरकार गम्भीर बा कहटी ओइनेहे ढेर अश्वासन डेगिल मने उ कागजमे सिमित हुइल । मुलुक बडलल, संरचना बडलल मने अपन मागप्रति सरकार गम्भीर नइहुइल कहटी फेरसे मुक्तकमरीहुकनके आन्दोलनके सुरुवाट करटी सडकमे आइलागल बटै ।
अपनेहुकनके समस्या समाधान ओ माग सम्बोधनके लाग स्थानीय सरकारहे मुक्तकमलरीहुक्रे ज्ञापनपत्र बुझैटी बटै । मुक्त कमलरी विकास मञ्च कैलाली, मुक्त कमलरी विकास मञ्च स्थानीय समितिसे टमान माग रख्टी नगरपालिका, गाउँपालिकाहे ज्ञापनपत्र बुझाइ टै ।
मुक्त कमलरीहुकनके चाहाना शिक्षा, सीप, रोजगार, जमिन सहितके पुनस्र्थापना, प्राविधिक शिक्षाके व्यवस्था करे पर्ना, लोकसेवा तयारी कक्षाके व्यवस्था हुई पर्ना, ३६ महिने सीप मुलक तालिमके व्यवस्था करे पर्ना लगायतके १० बुँदे मागसहित स्थानीय सरकारके प्रमुखहे ज्ञापनपत्र बुझैना काम करटै ।
ज्ञापनपत्र बुझाइबेर कमलरीहुकनके समस्या सम्बोधनके लाग अपने प्रतिबद्ध रहल, मुक्तकमलरीहुकनहे राज्यसे पैना शिक्षा, स्वास्थ्य, रोजगारी जैसिन सेवा सुविधा डेहुवइना आश्वासन डेजाइटा यी मेरिक आश्वसान पहिलेफे डेगिल रहे टबमारे आब कार्यान्वयन कैके डेखैना बेला आइल बा ।
आन्दोलनरत पक्षसे सरकार बार्ता करके माग मुद्दा सम्बोधन कैना सम्झौता करठ मने कार्यान्वयनके पाटोमे भर फिटलो बा । मुक्त कमलरी विकास मञ्च ओ सरकारविच हुइल १० बुँदे सम्झौता हुइल रहे, मने कार्यान्वयनके लाग मुक्तकमलरीहुकनहे ढेर आन्दोलन करे परल, जेम्ने कुछ बुदाँ केल पुरा हुइल बा । मालिकके घर काम करटी–करटी वेपत्ता कमलरीके खोजी तथा हत्या करल कमलरीहे न्याय डेहे पर्ना फेरसे मुक्तकमरीहुक्रे जोरदार माग उठजैटी बटै । मुक्त कमलरी विकास मञ्चके अन्सार सबसे ढेर कैलालीसे कमलरीहुक्रे बेपत्ता हुइल बटै । मञ्चके तथ्यांकअनुसार कैलालीके १२ जाने, बाँकेके ६ जाने, दाङके पाँच जाने ओ बर्दियाके चारजाने कमलरी घरपरिवारके सम्पर्कमे नइहुइट । आर्थिक अभावमे उपचार नइपाके कैलालीके हेमा चौधरी सिकलसेल, प्युठानके सीमा घर्ती मुटुरोगसे ओ बर्दियाके सरीता चौधरीके भाइरल जुरीके कारण निधन हुइल रहे । सरकार दुईजाने मृतक मुक्त कमलरीके परिवारहे पाँच लाख क्षतिपूर्ति तथा देशहे कमलरी मुक्त राष्ट्र घोषणा करल रहे ।
सरकार २०७० जेठ २४ गते मुक्त कमलरीहुकनहे परिचयपत्रके व्यवस्था कैना, शिक्षा, स्वास्थ्य तथा मुक्त कमलरीके पुनस्र्थापनाके कार्यक्रम नन्ना लगायतके १० बुँदे सम्झौता करल रहे । दाङलगायत पश्चिम नेपालके बाँके, बर्दिया, कैलाली ओ कञ्चनपुरमे करके १२ हजार ७ सय मुक्त कमलरीके अवस्था मुक्तिपाछेफे दयनीय रहल उल्लेख करटी मुक्तकमलरी विकास मञ्च हाली सहमति कार्यान्वयनके लाग माग करटी बा ।
ढेर जैसिन मुक्तकमलरीहुक्रे परिचयपत्र नइपाइल कारण शिक्षा, स्वास्थ्य, रोजगारसे बन्चित हुइटी बटै, छुट मुक्त कमलरीहे नेपाल सरकारके ओरसे तत्काल आधिकारिक परिचयपत्र वितरण करे पर्ना, मुक्त कमलरी शिक्षा निर्देशिका २०६८ हे संशोधन करके छात्रवृत्ति रकम वृद्धि करे पर्ना, मुक्त कमलरीके लाग छोट ओ नम्मा अवधिके व्यवसायिक तालिमके व्यवस्था करे पर्ना ओ सरकारसंग हुइल १० बुँदे सम्झौताके सक्कु बुँदाके तत्काल कार्यान्वयन करे पर्ना माग मुक्त कमलरी विकास मञ्च करटी बा । टबमारे संघीय सरकारहे जवाफदेहिता बन्ना बा कलेसे अपन करल सम्झौता ओ मुक्तकमरीहुकनके माग सम्बोधन कैना आवश्यक बा ।
