नमैया कुलुवा भाँठके सडक निर्माण
नरेन्द्र चौधरी
हसुलिया, १० बैशाख । कैलाली जिल्लाक कैलारी गाउँपालिका वडा नम्बर–१, रानामुडा ओ नवलपुरके विचमे रहल नमैया कुलुवाहे भाँठके सडक निर्माण कैगिल बा । सडक निर्माण हुइलपाछे उहाँक जग्गा धनीहुक्रे खुशी हुइल बाटै ।
रानामुडाके पुरुवपश्चिम रहल उ सडक डम्मरबहादुर जोशी ओ जपिराम चौधरीके जग्गासे दक्षिणसे सुरु करके उत्तरमे फुरु चौधरीके जग्गासम एक किलोमिटर सडक निर्माण कैगिल बा । नमैया कुलुवाहे भाँठके चार मिटर चौडाई, एककिलोमिटर सडक लम्बाई रहल सडकके दुनु छेउमे कुलुवा बनाइल बा ।
बर्खाके बेला छेउछाउक किसान धान लगासेकलपाछे, विच्चे रहल किसानहे गोरुडाँगर लैजैना कर्रा रहे । नमैया सडक निर्माण समितिके अध्यक्ष फुलराम चौधरी कहलै– खेतुवामे काम परल बेला अवातजवात कैना सहजुल होए कहिके सडक बनैली ।’ सडक निर्माण कैना नमैया कुलुवक छेउछाउमे रहल जग्गा धनीसंग प्रतिजग्गा धनीसे एक हजार रुप्याके दरसे रकम संकलन करल उहाँ जनैलै ।
कैलारी गाउँपालिका वडा नम्बर ३, मुडाके ४५ जग्गा धनी ओ और गाउँक मिलाएर ५७ जाने जग्गा धनीसे उठाके सडक निर्माण कार्य आघे बढाइल अध्यक्ष चौधरी बटैलै । वडा कार्यलयसे अनुमति लेके सडक निर्माण कार्य सुचारु करल समितिके अध्यक्ष जनैलै । आब वडा नम्बर १ के इन्जिनियरसे नापके सडक पास करके काम आघे बह्रैना उहाँ जनैलै ।
‘सडक नइहुके किसानहुक्रे ढेर सस्ती भोगे परल रहे,’ नमैया सडक निर्माण समितिके सदस्य दशरथ चौधरी कहलै, ‘अब सडक बनसेकल कृषकहुकनहे सामान ओसरपोसर कैना समस्या भोगे नइपरी, ढेर जनेक घरेरीके समस्या रहे सडक बनलपाछे घर बनाई सेक्ही ।’ समितिके सदस्य दशरथ कहलै, सडक बनलपाछे खेतुवामे अइना जैना सहजुल हुइल बा ।
नमैया कुलुवामे सडक निर्माण हुके सडकसे भिटर जग्गा रहल जग्गाधनीहुकनके सडक लग्गे हुके सडकसे खेतुवामे सामान लैजैना सहज हुइना किसान सुकदेव चौधरी बटैलै । ‘पहिले सडक नइहुके दुरसे सामान बोके परे,’ उहाँ कहलै, ‘अब सडक बन्के सहजुल हुइल अन्नवाली ओसर्न सहजुल हुई ।’
दुसर किसान सन्तोषप्रसाद चौधरीफे अन्नबाली खेतुवामे नन्ना, भैसगोरु, दल्लव, गाडी खेतुवामे लैजैना सहज हुइना बटैलै ।
