‘व्यवसायी प्रोत्साहनके जिम्मेवारी स्थानीय तहके’

पहुरा समाचारदाता
हसुलिया, १० बैशाख । कैलारी गाउँपालिकाके अध्यक्ष लाजुराम चौधरी स्थानीय उद्योगी व्यवसायीहुक्रनके हकअधिकार लगायत प्रोत्साहनके जिम्मेवारी स्थानीय तहके रहल बटैले बाटै ।

कैलारी उद्योग वाणिज्य संघके शुकके हसुलियामे हुइल प्रथम साधारण सभाके समुद्घाटन समारोहहे सम्बोध कैटी अध्यक्ष चौधरी गाउँपालिका अन्तर्गत व्यापार व्यवसाय सञ्चालन करटी रहल सम्पूर्ण उद्योगी व्यवसायीहुक्रनके हक अधिकार तथा टमान मेरिक अनुदान सहित ओइनहे प्रोत्साहान कैना स्थानीय तहके जिम्मेवारी रहल बटाइल हुइट ।

‘व्यापार व्यवसाय कैना दौरानमे व्यापारीहुक्रनहे टमान मेरके समस्या तथा चुनौटी ओ हक अधिकारके बात अइना करठ्,’ अध्यक्ष चौधरी कहलै– ‘उ उद्योगी व्यवसायीहुक्रनके हक अधिकार लगायत व्यापारके लाग प्रोत्साहन कैना जिम्मेवारी स्थानीय तहके हो ।’

अध्यक्ष चौधरी यहाँके उद्योगी व्यवसायीहुक्रनहे उद्योग तथा व्यापार व्यवसाय सञ्चालन करेबर अनिवार्य रुपमे फर्म दर्ता कैके सक्कु व्यवसायीनहे करके दायरामे अइना आग्रह करल रहिट । साथे उहाँ उपभोक्ताहुक्रनके खाद्य सुरक्षाके अधिकारहे ध्यान डेहे पर्ना फेन सक्कु व्यवसायीनहे आग्रह करल रहिट ।

‘उपभोक्ताहुक्रनके स्वास्थ्य व्यापारीहुक्रनके हाठमे रहठ्, ओकर लाग व्यापारी जिम्मेवार बने पर्नाके साथे सरसफाईमे ध्यान डेना अति आवश्यक रहल बा,’ अध्यक्ष चौधरी कहलै– ‘आहेमारे सक्कु व्यापारीनहे मोर का अनुरोध बा कलेसे, उपभोक्ताहुक्रनके स्वास्थ्यउपर कबु खेलवाड नकैडेबी ।’
गाउँपालिके अन्तर्गत छिटकके रहल सक्कु व्यवसायीनहे संघमे आवद्ध करैना सफल हुइलमे कैलारी उद्योग वाणिज्य संघहे उहाँ धन्यवाद फेन डेहल रहिट ।

कार्यक्रममे गाउँपालिकाके उपाध्यक्ष लक्ष्मी सत्गौंवा थारू गाउँपालिका भिट्टर सञ्चालन रहल अधिकांश व्यापार व्यावसाय विना दर्ता सञ्चालन रहल बटैली । उहाँ व्यवस्थित ओ अनिवार्य रुपमे दर्ता कैके व्यापार व्यवसाय सञ्चालन कैना सक्कु व्यवसायीनहे आग्रह फेन करल रही । साथे उपाध्यक्ष थारू आपनठन व्यापारीहुक्रनसे कर बह्राइल जनगुनासो आइल बटैली ।

‘व्यापारीनठनसे मोर यहाँ कर बह्राइल गुनासो आइल बा,’ उपाध्यक्ष थारू कहली्– ‘हम्रे आपन स्थानीय तहमे कर नैबह्राके करके दायरा ओ यहाँके व्यवसायीहुक्रनके अवस्था हेरके कर निर्धारण करले बाटी ।’

कार्यक्रममे वडा नम्बर ३ के वडा अध्यक्ष कैलाश कुश्मी वैधानिक रुपमे व्यापार व्यवसाय सञ्चालन करे पर्ना जोड डेहल रहिट । ओस्टके वडा नम्बर ५ के वडा अध्यक्ष विष्णु प्रसाद चौधरी यहाँके व्यापार व्यवसाय बह्राइक लाग यातायातके पहुँच हुइ पर्नामे जोड डेहल रहिट ।

कैलारी उद्योग वाणिज्य संघके सल्लाहकार संयोजक बतासु चौधरी यहाँके उद्योग व्यवसाय प्रर्वद्धन कैना सबके दायित्व रहल बटाइल रहिट ।

कार्यक्रममे समाजसेवी वुद्धिजिवी राजसमझ चौधरी कैलारी गाउँपालिकाहे समृद्ध बनाइक लाग व्यापारीहुक्रनके महत्वपूर्ण भूमिका रहल बटाइल रहिट ।

कार्यक्रममे नेकपा माओवादी केन्द्रके जिल्ला सदस्य बसन्त चौधरी, नेपाली कांग्रेसके रमेश चौधरी, एमालेके दया शंकर चौधरी, गदरिया बजार व्यवस्थापन समितिके सचिब जंग बहादुर चौधरी लगायत शुभकामना मनतब्य राखल रहिट ।

कार्यक्रममे संघके महासचिव शंकर प्रसाद चौधरी संघके अवधारणा, लक्ष्य तथा उद्देश्य बारे जानकारी करल रहिट । ओस्टके कोषाध्यक्ष विशेष कुमार चौधरी संघके आव २०७७/०७८ के १ लाख २३ हजार रुपैया बराबरके आयव्यय प्रस्तुत करल रहिट ।

कार्यक्रममे संघके अध्यक्ष नेपालु चौधरीके अध्यक्षतामे हुइल रहे । कार्यक्रममे स्वागत मनतब्य संघके उपाध्यक्ष तकर्ना चौधरी राखल रही कलेसे सञ्चालन सुनिता चौधरी करल रही ।

उहे बिच नव निर्वाचित संघके सम्पूर्ण पदाधिकारीहुक्रनहे गाउँपालिका अध्यक्ष चौधरी सपथ ग्रहण कराइल रहिट । साथे पदाधिकारीनहे प्रमाण पत्र, पहुनाहुक्रनहे मयााके चिनो सहित सम्मान करल रहे ।

संघके कार्यालय उद्घाटन

कैलारी उद्योग वाणिज्य संघके कार्यालय उदघाटन करल बा । कैलारी गाउँपालिकाके अध्यक्ष लाजुराम चौधरी रिबन काटके कार्यालय उद्घाटन करल रहिट ।

उद्घाटन कार्यक्रममे संघके अध्यक्ष नेपालु चौधरी संघके कार्यालय भाडामे लेके सञ्चालन करे परल ओरसे कार्यालयके लाग गाउँपालिकासे आवश्यक बजेट विनियोजन कैडेना अध्यक्ष चौधरीहे अनुरोध करल रहिट ।

२०७७ माघ २६ गते जिल्ला प्रशासन कार्यालय कैलालीमे विधिवत रुपमे दर्ता हुइल संघमे अब्बे हसुलिया, पवेरा, कैलारी, मोहनी बजार, गदरिया बजार सहितके १ सयसे ढिउर उद्योग व्यवसायीनके आवद्धता रहल बा । उद्घाटन कार्यक्रममे वडा अध्यक्ष, समाजसेवी वुद्धिजिवी व्यापारीहुक्रनके सहभागिता रहल रहे ।