धनगढी एफसीके सहप्रायोजकमे सगरमाथा ओ एसआयल सेभेनसंग सम्झौता
पहुरा समाचारदाता
धनगढी,१० बैशाख । धनगढी एफसीके सह–प्रायोजकके रुपमे सगरमाथा सिमेन्ट ओ एसआयल सेभेनसंग सम्झौता हुइल बा । शुकके रोज सगरमाथा सिमेन्ट ओ एसआयल सेभनसंग सहप्रायोजन सम्झौता कैगिल हो ।
नेपालमे पहिल बार हुई लागल फ्रेन्चाइज फुटबल प्रतियोगिता नेपाल सुपर लिगमे धनगढी एफसी सशक्त रुपमे आघे आइल धनगढी एफसीके अध्यक्ष सुवास शाही जनैलै ।
सम्झौता पत्रमे धनगढी एफसीके अध्यक्ष सुवास शाही तथा सगरमाथा सिमेन्टके उत्पादक कम्पनी घोराही सिमेन्ट इन्डिष्ट्रिजके मार्केटिङ प्रमुख प्रतिक अधिकारी तथा एसआयल नेपालके आधिकारिक विक्रेता त्रिशुल अटोमोबाइल्सके अध्यक्ष दीलिप भट्टराई हस्ताक्षर करलै । दुनु कम्पनीके लाग एकवर्षके लाग सम्झौता हुइल हो ।
धनगढी एफसीसंग नेपालके विश्वसनीय दुई ब्रान्डहे जोरे पाके एकदम हर्षित रहल गो ड्रिमर्स प्रालि धनगढी एफसी)के अध्यक्ष सुवास शाही बटैलै । ‘दुनु ब्रान्डके आगमनसे हमारमे अभिन उत्साह बढल बा,’ उहाँ कहलै, ‘सगरमाथा सिमेन्ट ओ एस–आयलसे हमारप्रति डेखाइल विश्वासप्रति आभारी बटी ।’ यी सम्झौतासे धनगढी फुटबलके केल नइहुके समग्र नेपाली फुटबलके विकासमे योगदान पुग्न विश्वास हम्रे लेले बटी, यी वर्ष सुरुवात हुइलेसेफे अइना वर्ष हमारबीचके सहकार्य निरन्तरता पैना विश्वास लेहल उहाँ बटैलै ।
सगरमाथा सिमेन्ट मार्केटिङ प्रमुख प्रतिक अधिकारी नम्मा समयसे धनगढीके खेलकुदसंग जोरल बटैलै । खेलकुदके विकासमे योगदान कैना उदेश्य अनुरुप हम्रे धनगढी एफसीसंग सहप्रायोजन करल उहाँ बटैलै ।
त्रिशुल अटोमोबाइल्स (एस–आयल सेभेन) अध्यक्ष दीलिप भट्टराई विगतसे एस–आयल सेभनसे खेलकुदमे लगानी करटी आइल बटैलै । यी आघे विश्वके टमान खेलकुदमे लगानी करटी आइल कम्पनी यी बार नेपाली खेलकुदमेफे लगानी कैना सोचके साथ धनगढी एफसीसंग जोरल उहाँ जनैलै ।
