कोरोना जोखिम घटैना बार अनुसारके सेवा डेना

पहुरा समाचारदाता
धनगढी, १० बैशाख । कोभिड–१९ को जोखिम बढलपाछे धनगढी उपमहानगरपालिकासे वडा कार्यालयहे वडाके नागरिकहे सेवा डेना अलग अलग बार तोकल बा ।

धनगढी उपमहानगरपालिकालिकासे बार अनुसारके सेवा बैशाख १२ गतेसे लागु हुइना बटाइल बा । बहुट आवश्यक सेवाके लाग भर बार अशरा लागे नइपर्ना नगरप्रमुख नृपबहादुर वड बटैलै । कोरोना जोखिमके कारण उपमहानगरपालिका कार्यालयमे हुइना भिडभाड घटैना बार अनुसारके सेवा लेना व्यवस्था मिलाइल हो नगरप्रमुख वड कहलै, ‘वडामे सेवा नियमित डेजाई ।’

धनगढी उपमहानगरपालिका वडा नं १४, १८, ओ १९ के सेवाग्राहीके लाग अँटवार तोकल बा । ओस्टेक करके १२, १५, १६, १७ वडाहे सोमबार, १, २, ८ वडाके मंगर, ७, ९, १० ओ १३ के बुधके, ५, ६, ११ वडाके बिफे ३, ४ नम्बर वडाके शुकके सेवा लेना पाला निर्धारण करल बा । धनगढी उपमहानगरपालिकासे बार अनुसार प्रवाह हुइना सेवाके बारेमे नगरवासीहे जानकारी डेना ओ उहे अनुसारके व्यवस्था मिलैना कर्मचारीहुकनहे निर्देशन डेहल बा ।