भारतमे कोरोना संक्रमित संख्या लौवा विश्व रेकर्ड बनाइल

काठमाडौं, ११ बैशाख । भारतमे कोरोना संक्रमित संख्यासे नयाँ विश्व रेकर्ड बनाइल बा । सरकारी अधिकारीहुक्रे डेहल जानकारीअनुसार पछिल्का २४ घण्टामे भारतमे तीन लाख ४७ हजार ७८६ जाने सक्रमित हुइल बटै ।

यी संख्या कोरोनाभाइरसके महामारी सुरु हुइलठेनसे सबसे ढेर अधिकारीहुक्रे जनैले बटै । एक्के दिन अटरा ढेर संक्रमित संख्या विश्वमे पहिल रहल समाचारमे जनाइल बा । केन्द्रीय स्वास्थ्य मन्त्रालयके अधिकारीहुक्रे पछिल्का एक दिनमे दुई हजार ६२४ जानेक मृत्यु हुइल विवरण सार्वजनिक करले बटै ।

यी संगे भारतमे कोरोनाभाइरससे अभिनसम कुल एक लाख ८९ हजार ५४४ जानेक मृत्यु हुइल मन्त्रालय जनैले बा । भारतमे अभिनसम कुल एक करोड ६६ लाख १० हजार ४८१ जाने कोरोनाभाइरससे संक्रमित हुइल पाइल बा । कुल सक्रमित मन्से २५ लाख ५२ हजार ९४० जाने अभिनफे संक्रमित अवस्थामे रहल मन्त्रालयके तथ्याङक बा ।

ओस्टेक करके अभिनसम एक करोड ३८ लाख ६७ हजार ९९७ जाने संक्रमण मुक्त हुसेकल बटै । उ मध्ये दुई लाख १९ हजार ८३८ जाने पछिल्का एक दिनमे संक्रमणमुक्त हुइल हुइट । भारतमे गैल जनवरी १६ से कोरोनाभाइरस विरुद्धके खोप अभियान चल्टी रहलेसेफे भाइरससे संक्रमित ओ मृतकके सख््यामे दिन प्रतिदिन बृद्धि हुइटी गैल बा ।