टी–२० मे नेपालके अभिनसके कीर्तिमानी जीत
काठमाडौं, ११ बैशाख । त्रिकोणात्मक टी–२० सिरिज क्रिकेटके फाइनलमे नेपालसे नेदरल्याण्डहे पराजित करटी कीर्तिमानी जीत हाँसिल करले बा । शनिच्चर त्रिवि क्रिकेट मैदानमे हुइल खेलमे नेपालसे १४२ रनके सानदार जित हाँसिल करल हो ।
५ डिसेम्बर २०१९ मे नेपालसे भुटानहे १४१ के कीर्तिमानी जीत दर्ता कराइल रहे । उहे रेकर्डहे तुरटी शनिच्चर नेपालसे नेदरल्याण्डहे १४२ रनसे पराजित करल हो ।
टस हारके पहिले ब्याटिङ करल नेपाल निर्धारित २० ओभरमे ३ विकेट गुमाके २३८ रन बनाइल रहे । २३९ रनके लक्ष्य पछ्यइल नेदरल्याण्ड १७ ओभर २ बलमे सक्कु विकेट गुमैटी ९६ रनमे समेटल ।
ब्याटिङमे नेदरल्याण्डके दुई खेलाडी रन आउट हुइलै कलेसे २ विकेट कमल ऐरी लेलै । उहे करण केसी ३ विकेट लेलै कलेसे सन्दीप लामिछानेफे २ विकेट लेलै । ओस्टेक करके अविनाश बोहोरा १ विकेट लेलै । यी आघे ब्याटिङओर निर्धारित २० ओभरमे नेपालसे ३ विकेटके क्षतिमे २ सय ३८ रन बनाइल रहे । टी–२० अन्तर्राष्ट्रिय खेलमे नेपालके यी सबसे भारी योगफल हो । नेपाल सन् २०१९ मे भुटानविरुद्ध २ सय ३६ रनके योगफल तयार करल रहे ।
कुशल भुर्तेलसे शृख्लाके चौठा अर्धशतक बनैना क्रममे ५३ बलमे ७७ रन बनैलै । उहाँ यी क्रममे ८ चौका ओ ३ छक्का मरलै । नेदरल्यान्डसंगके पहिल खेलमे भुर्तेल ६१, मलेसियासितके खेलमे ६१ तथा नेदरल्याण्डस्सितके दुसरा खेलमे ६२ रन बनैले रहिट ।
कुशल मल्ल २४ बलमे २ चौका ओ ५ छक्काके मद्दतसे अर्धशतक पुरा करलै कलेसे दीपेन्द्रसिंह ऐरी केल १८ बलमे ५ चौका ओ ३ छक्काके मद्दतसे ४८ रन बनैलै । कप्तान ज्ञानेन्द्र मल्ल ३३ रनके योगदान डेलै । उहाँ ३ चौका ओ २ छक्का मरलै । नेदरल्याण्डके लाग फिलिपे बोसेभाइनसे २ विकेट लेलै । नेदरल्याण्डसे टस जिटके पहिले बलिङ कैना निर्णय करल रहे ।
फाइनलमे पुगटसम नेपालसे उत्कृष्ट खेल प्रदर्शन करटी चार खेलमे तीनमे जीत तथा एकमे हार बेहारटी फाइनलमे पुगल रहिट । नेपाल पहिल खेलमे नेदरल्यान्डहे नौ विकेटसे पराजित करल रहे । दुसरा खेलमे मलेसियाहे नौ विकेटसे पराजित करल हो कलेसे नेपाल टिसरा खेलमे नेदरल्यान्डसे तीन विकेटसे पराजित हुइल रहे ।
चौठा खेलमे भर नेपाल मलेसियाहे ६९ रनसे पराजित करल रहे । ओस्टेक नेदरल्यान्ड दुई खेलमे जीत निकारल कलेसे एक खेल बराबरी खेलल रहे । एक खेलमे नेदरल्यान्ड पराजित हुइल रहे ।
