प्रधानमन्त्रीसे धरहराके उद्घाटन
काठमाडौं, ११ बैशाख । प्रधानमन्त्री केपी शर्मा ओली शनिच्चरके रोज पुनर्निर्मित धरहराके उद्घाटन करले बटै । २०७२ के भूकम्पसे ढलाइल धरहरा ठरहयाइलसंगे एक समारोहके बीच पुनर्निर्मित धरहराके प्रवेशद्वारमे धारल शिलालेखके प्रधानमन्त्री ओली अनावरण करके उदघाटन करल हुइट । मने हालसमफे धरहराके फेदमे निर्माण हुई पर्ना संरचनागत काम भर सेकल नइहो ।
उदघाटनपाछे प्रधानमन्त्री लिफटसे धरहराके २० औ तलामे पुगके पुष्पवृष्टि करल रहिट । भूकम्पसे क्षतिग्रस्त रहल धरहरा पुनर्निर्माणके लाग प्रधानमन्त्री केपी शर्मा ओली २०७२ फागुन ४ गते ‘मोर धरहरा मै बनैम” अभियानके घोषणा करल रहिट । २०७५ साल पुस ५ गते प्रधानमन्त्री ओलीसे शिलान्यास करल पुनर्निर्मित धरहराके प्रधानमन्त्री ओलीसे समुदघाटन हुइल बा । राष्ट्रिय पुनर्निर्माण प्राधिकरणके नेतृत्वमे पुनर्निर्मित धरहराके लाग ३ अर्ब ४८ करोड रुपैयाँमे ठेक्का डेहल रहे । धरहराके २२ औै तलामे पुरान धरहरासे निकारल पुरान शिवलिङ धारल बा ।
राष्ट्रिय पुनर्निर्माण प्राधिकरणके सचिव मणिराम गेलाल धरहरा निर्माण एक ठो रुपान्तरणफे रहल बटैलै । यी आघे धरहरा ऐतिहासिक पहिचानके रुपमे चिन्हलमे आब भर पहिचान सहितके स्पेससे प्लेस बनाइल ओरसे सामाजिक रुपान्तरणफे हुइल बटैलै ।
९० सालके महाभूकम्पसे क्षति पुगाइलपाछे ११ तले धरहरा ९ तलामे सिमित हुइल रहे । ओकरपाछे ९ तलामे सिमित धारके पुर्ननिर्माण करल रहे । मने अब्बे भर बाहेरसे हेरेबेर ११ तले रहलेसेफे भिटर २२ तला रहल बा । ओम्ने २ ठो लिफट धारल बा । जमिन टरे २ तला बनाइल बा । ४२ रोपनी क्षेत्रफलमे फैलल धरहराके वरपर विश्राम स्थल सहितके बगैँचा रहल कलेसे संक्षिप्त ऐतिहासिक सुनधारामे २४ सै घण्टा पानी अइना व्यवस्था मिलाइल बा ।
ओस्टेक करके ४ सय गाडी ओ ७ सय मोटरसाईकल पार्किङके फे व्यवस्था बा । धरहराके पुनर्निर्माणमे मौलिकताके सम्बद्र्धधन करटी आधुनिकताके प्रचुर प्रयोग करल बा ।
धरहराके टावरके काम पूरा हुइलेसेफे बाहिरी संरचनाके काम सम्पन्न हुइना अभिन ९ महिना लग्ना प्राधिकरण जनैले बा ।
